Vendet që u bashkuan së fundmi me NATO-n, Suedia dhe Finlanda, janë bërë automatikisht “shënjestra” të forcave ruse në hakmarrje të mundshme edhe me “një komponent bërthamor”.
Kështu deklaroi ish-Presidenti rus dhe zëvendëssekretari aktual i Këshillit të Sigurisë, Dmitry Medvedev. Këto vende “janë tani në një bllok armiqësor ndaj nesh”, theksoi Medvedev, i cituar nga agjencia Tass. “Kjo do të thotë se ata janë bërë automatikisht një objektiv për ushtrinë tonë, me sulme të mundshme hakmarrëse dhe madje edhe një komponent bërthamor”, tha ish-presidenti.
Medvedev shtoi se Rusia nuk duhej t’u “besonte” disa vendeve perëndimore, përfshirë Italinë. “Në vitet e para pas-sovjetike”, u citua Medvedev nga Ria Novosti të ketë thënë, “ne u besonim shumë atyre që nuk duheshin besuar fare, që nuk e meritonin besimin tonë”. Midis tyre, Medvedev përmendi “Shtetet e Bashkuara dhe Evropën Perëndimore, duke përfshirë vendet më të mëdha, Britaninë e Madhe, Francën, Gjermaninë dhe Italinë”.Shefi i Këshillit të Sigurisë Ruse, Dmitry Medvedev, tha se “fundi i Presidentit ukrainas Volodymyr Zelensky do të jetë më i trishtueshmi” dhe se trupat ruse duhet ta përfundojnë pushtimin e Ukrainës “me një fitore” dhe të “shkatërrojnë” atë që ai e quan, në propagandën e Kremlinit, “regjimi neonazist në Kiev”. Lajmi u raportua nga agjencia zyrtare ruse e lajmeve Ria Novosti. “Kur kreu i një shteti, qoftë edhe një aq i veçantë sa Ukraina, dhe një tip kaq patologjik sa ky personazh, mburret me gjëra të tilla, kjo do të thotë vetëm një gjë: se në fund edhe ai do të përfundojë në mënyrën më të trishtueshme”, tha Medvedev, duke komentuar lajmin, të raportuar gjithashtu nga Reuters, sipas të cilit Zelensky vlerësoi inteligjencën ukrainase për vrasjen e disa zyrtarëve të lartë rusë, por pa iu referuar rasteve specifike. “Para së gjithash, ne duhet ta përfundojmë operacionin special ushtarak në Ukrainë me një fitore dhe duhet ta shkatërrojmë regjimin neonazist në Kiev, por regjimin, jo shtetin, fati i të cilit është çështje e së ardhmes”, tha më vonë ish-presidenti rus, duke përdorur termin “operacion special ushtarak” që Kremlini përdor për t’iu referuar agresionit ushtarak kundër Ukrainës. Rusia e Putinit pushtoi Ukrainën duke pretenduar se do ta “denazifikonte” atë, por pretendimi i Moskës se qeveria në Kiev është “neonaziste” konsiderohet plotësisht i pabazuar nga shumica dërrmuese e analistëve politikë.
