Presidenti aktual i SHBA-së, Donald Trump, foli për luftën në Ukrainë gjatë një interviste me ABC News të transmetuar mbrëmë.
Në intervistën, e cila u përqendrua në 100 ditët e para të mandatit të ri të Trump, prezantuesi e pyeti atë rreth pikëpamjeve të tij kontradiktore mbi bisedimet e paqes.
Trump: Putini mund të jetë duke më mashtruar
Disa ditë më parë, Trump shkroi në rrjetin social Truth Social se është e mundur që Putini po “po e tërheq hundën” kur bëhet fjalë për negociata. Trump e bëri komentin menjëherë pas takimit me Presidentin ukrainas Volodymyr Zelensky në Vatikan më 26 prill. “Nuk ka asnjë arsye që Putini të qëllojë me raketa në zona civile, qytete dhe fshatra ditët e fundit”, shkroi Trump në atë kohë.
“Kjo është arsyeja pse mendoj se ndoshta ai nuk dëshiron fare ta përfundojë luftën, por thjesht po më zvarrit mua dhe ndoshta duhet t’i bëhet presion ndryshe, me sanksione bankare apo dytësore?” shtoi Trump në postim.
Kur një gazetar i ABC News e pyeti nëse mendonte se Putini po i zvarriste negociatat, Trump u përgjigj: “Është e mundur. Ai mund të më zvarrisë pak, por do të thoja se ai prapëseprapë do të donte ta ndalte luftën”, tha Trump gjatë intervistës. Pavarësisht dyshimeve të tij, ai më vonë tha në një intervistë: “Mendoj se ai dëshiron paqe, po. Mendoj se ai me të vërtetë e dëshiron atë.”
Trump, i cili më parë premtoi të negocionte paqen në Ukrainë brenda 100 ditëve nga kthimi në pushtet, kohët e fundit është bërë gjithnjë e më i frustruar nga ajo që ai pretendon se është mosgatishmëria e Moskës për t’i dhënë fund luftës, e cila ka vazhduar prej tre vjetësh.
Trump: Putini ëndërronte të merrte kontrollin e të gjithë Ukrainës. Nuk do ta lejoj ta bëjë këtë.
Zyrtarët amerikanë kanë theksuar se kjo javë do të jetë vendimtare për të vendosur nëse SHBA-të do të vazhdojnë të përfshihen në përpjekjet për paqe, në një kohë kur pakënaqësia e Trump po rritet.
Më 28 prill, Putin njoftoi një armëpushim tre-ditor nga 8 deri më 11 maj për të shënuar 80-vjetorin e fitores sovjetike mbi Gjermaninë naziste, të cilën i dërguari special i Trump, Keith Kellogg, e quajti “absurde”.
Kur u pyet nëse i beson Putinit, Trump shmangu një përgjigje të qartë dhe tha në një debat të nxehtë me një gazetar: “Nuk u besoj shumë njerëzve. As ty nuk të besoj.”
“Putini ëndërronte të merrte kontrollin e të gjithë vendit. Nuk mendoj se do ta lejoj ta bëjë këtë”, përfundoi Trump.
Edhe pse negociatat janë ende në vazhdim, forcat ruse kanë shtuar sulmet e tyre në javët e fundit, përfshirë edhe në rajonin e Sumy-t. Gjatë armëpushimit tre-ditor të mëparshëm të Pashkëve të Rusisë, midis 19 dhe 21 prillit, Zelensky akuzoi Moskën për gati 3,000 shkelje të armëpushimit.
