Nga Ymer Hysa-
Jo vetëm ai që e sheh për të parën herë Lagunën e Patogut, por edhe ata që e kanë parë disa herë mahniten, dhe krijojnë idenë se disa vende në natyrë janë krijuar për të na bindur se Parajsa ekziston. Ajo shtrihet gjatë bregut të Detit Adriatik në perendim të rrethit Kurbin dhe gjeografët e kanë emërtuar “Kompleksi Ligatinor i Patokut. Ajo shtrihet mes grykderdhjeve të lumenjëve Mat në Veri dhe Lumit Ishëm në Jug, dhe përfshin një shumllojshmëri habitatesh. Laguna e Patogut është njëra nga pesë lagunat e jashtme në bregdetin shqiptar, me një larmi të konsiderueshme të faunës ujore. Pozicioni i saj i favorshëm si dhe shumëllojshmëria e habitateve rreth lagunës, kanë krijuar kushte të përshtatshme për faunën ujore. Shumëllojshmëri e peshqve dhe pozicioni gjeografik i saj afër kryeqytetit e lehtëson frekuentim për një zhvillim të turizmit natyror, të vëzhgimit dhe kulinarisë. Ndaj themi me bindje se Patoku është kthyer në një destinacion për turizmin familjar dhe atë të kulinarisë detare. Përgjatë gjithë vijës bregdetare prej 8 km të Patokut, kushdo që e viziton gjen qetësi si askund tjetër. Niveli i cekët i ujit, që shtrihet afërsisht në një sipërfaqe prej 400 hektarësh, ka krijuar kushte dhe mundësi që bimët të dalin mbi sipërfaqe. Aty ku uji s’ka mundur dot të mbulojë tokën, janë krijuar zona të vogla ishullore, të harlisura nga shkurret dhe lulet e egra që në muaj të veçantë krijojnë bukuri përrallore përmes shumlloshmërisë së ngjyrave që ato kanë.
