Ministria e Kulturës i është përgjigjur ish ministres Dumoshi duke thënë se në përpjekje për të justifikuar ndërhyrjet e paligjshme nëpër zona që mbrohen me Ligjin për Trashëgimi Kulturore, Komuna e Prishtinës dhe zyrtarë politik, edhe sot, janë shërbyer me pseudoargumente e pseudoarsyetime ligjore, anipse me ato veprime, inkriminojnë për herë e më shumë, edhe vetën e tyre.
MKRS, përmes një reagimi në Facebook, në bën thirrje që proceduat ligjore, autoriteti i institucioneve kompetente, të mos keqpërdoret për debate politike apo arsyetim të dështimit të projekteve të kryeqytetit sepse këto precedente janë të rrezikshme për konsolidimin e përgjithshëm të sistemit efektiv të ruajtjes dhe mbrojtjes së trashëgimisë kulturore.
“Pseudoargumenti vijues ishte se lista e trashëgimisë kulturore vlen vetëm për 1 vit. U treguam se kjo qëndron nëse nuk kemi një ri-vazhdim tjetër të vlefshmërisë së listës së miratuar me Vendim të Ministrit sipas Ligjit Nr.02/L-088 dhe se këto vazhdime janë aplikuar parreshtur nga viti 2008 e mëtutje dhe se ky ligj, nuk ndalon përditësimin e listës. Miratimin e listës së përkohshme, e kanë aplikuar të gjithë ministrat nga të gjitha subjektet politike që e kanë ushtruar funksionin e Ministrit në MKRS, pa përjashtim. Nëse ky argument do të qëndronte, atëherë Kosova nuk do të kishte fare regjistër të aseteve të trashëgimisë kulturore, pra nuk do të kishte trashëgimi kulturore në Kosovë”, thuhet në reagimin e MKRS-së.
