Ministria e Shëndetësisë dhe Qendra Evropiane për kontrollin dhe parandalimin e sëmundjeve ngjitëse (ECDC) kanë nënshkruar memorandum mirëkuptimi për forcimin e bashkëpunimit në fushën e sëmundjeve ngjitëse.
Sipas njoftimit, ky memorandum i mirëkuptimit është nënshkruar ndërmjet ECDC-së, përfaqësuar nga drejtoresha Pamela Rendi-Wagner, dhe Ministrisë së Shëndetësisë së Kosovës, përfaqësuar nga Ardita Baraku, drejtoreshë e Institutit Kombëtar i Shëndetësisë Publike.
“Qëllimi i këtij Memorandumi të Mirëkuptimit është forcimi i bashkëpunimit ndërmjet palëve, për parandalimin dhe kontrollin e sëmundjeve ngjitëse, përmes përgatitjes për pjesëmarrje në aktivitetet e ECDC-së dhe shkëmbimit të informacionit në kohë”, ka njoftuar MSH.
Ndër të tjera, bëhet me dije se bazuar në rregulloret dhe ligjet relevante të Bashkimit Evropian dhe Republikës së Kosovës, ky dokument synon të vendosë një kuadër të bashkëpunimit për: “Pjesëmarrje në aktivitetet mbështetëse të ECDC-së për vendet kandidate për anëtarësim; Forcimin e mbikëqyrjes, ndarjes së të dhënave dhe reagimit ndaj kërcënimeve shëndetësore; Trajnime, zhvillim profesional dhe përmirësim të qasjes nder sektoriale “One Health” për luftimin e rezistencës antimikrobike; Shkëmbim të inteligjencës epidemiologjike për sëmundje të caktuara dhe pjesëmarrje si vëzhgues në rrjetet e ECDC-së; Mbështetje për përmirësimin e kapaciteteve të përgjigjes ndaj epidemive në përputhje me Rregulloren Ndërkombëtare të Shëndetit (IHR)”.
“Marrëveshja përcakton koordinimin e aktiviteteve të përbashkëta përmes caktimit të pikave ndërlidhëse që do të punojnë në identifikimin e fushave të përbashkëta për bashkëpunim përmes planeve vjetore dhe shumëvjeçare të punës”, njofton tutje MSH.
