Në Ditën Botërore të Lirisë së Shtypit, dy partitë opozitare në legjislaturën e fundit, Lidhja Demokratike e Kosovës dhe Partia Demokratike e Kosovës kanë reaguar ashpër ndaj Qeverisë Kurti, duke e akuzuar atë për përkeqësimin e gjendjes së lirisë së mediave në vend.
Të dyja këto parti e konsiderojnë si tejet shqetësues faktin që Kosova është renditur në pozitën e 99-të në Indeksin Botëror të Lirisë së Shtypit nga organizata ndërkombëtare “Reporterët pa Kufij” (RSF), duke pësuar kështu rënien më të madhe në 15 vitet e fundit dhe duke u renditur më keq se të gjitha vendet tjera të rajonit.
LDK, në komunikatën e saj, thekson se ky regres i thellë është rezultat i qasjes së Qeverisë aktuale ndaj mediave dhe gazetarëve.
“Për katër vite qeverisje, ky pushtet ka sulmuar gazetarët, denigruar mediat kritike si dhe ka tentuar të heshtin fjalën e lirë”, thuhet në reagimin e LDK-së, e cila shton se liria e shtypit është themel i një demokracie funksionale dhe se pa të, qytetarët privohen nga e drejta për informim, ndërsa abuzimet e pushtetit mbeten në hije.
Nga ana tjetër, PDK e cilëson këtë rënie në indeks si një “aktakuzë politike dhe morale për Qeverinë e Kosovës”. Sipas PDK-së, ambienti për gazetarët është bërë represiv, i frikës dhe shantazhit, duke u karakterizuar nga sulme verbale dhe linçime publike nga pushteti.
“Në vend të mbështetjes së gazetarisë së lirë, pushteti aktual ka zgjedhur të sulmojë gazetarët, t’i etikojë ata, t’i injorojë pyetjet legjitime dhe të favorizojë propagandën mbi transparencën,” thuhet në komunikatën e PDK-së.
Të dyja partitë kanë shprehur mirënjohje për punën dhe përkushtimin e gazetarëve në Kosovë, duke premtuar mbështetje të fuqishme për mediat e pavarura dhe zotim për krijimin e një klime të lirë dhe demokratike për shtypin në qeverisjet e ardhshme.
