Presidenti ukrainas Volodymyr Zelensky ka hedhur poshtë propozimin e presidentit rus Vladimir Putin për një armëpushim tre-ditor për të shënuar 80-vjetorin e Ditës së Fitores.
Zelensky e quajti idenë e Putinit një “prodhim teatral” për të krijuar “një atmosferë daljeje nga izolimi”. Në vend të kësaj, presidenti ukrainas po këmbëngul për një armëpushim 30-ditor.
“Një armëpushim pa kushte është modeli i propozuar nga amerikanët. Ne po e ndjekim atë. Nga kjo datë ose një tjetër – mundësisht më herët. Pse një armëpushim 30-ditor? Sepse është e pamundur të biesh dakord për asgjë në tre, pesë, shtatë ditë”, raporton Interfax-Ukrainë të ketë thënë Zelensky.
Zëdhënësi i Kremlinit, Dmitry Peskov, duke komentuar deklaratat e Zelensky-t , tha se reagimi i autoriteteve ukrainase ndaj propozimit rus është një provë e gatishmërisë për paqe. “Ne nuk do të presim deklarata të paqarta, por deklarata përfundimtare dhe, më e rëndësishmja, veprime që synojnë uljen e tensionit të konfliktit gjatë festave”, shtoi Peskov.
Përveç kësaj, udhëheqësi ukrainas u tha gazetarëve sot për takimin e tij me Presidentin e SHBA-së Donald Trump në Vatikan. “Me gjithë respektin për ekipet tona, por formati kokë më kokë, sipas mendimit tim, funksionoi. Patëm atmosferën e duhur për vetë bisedën”, tha Zelensky. Pas takimit, tha ai, Trump “filloi t’i shihte gjërat pak më ndryshe”.
Senati amerikan përgatit sanksione në rast se Rusia dështon në bisedimet e paqes
Zelensky dhe Trump u takuan më 26 prill në Vatikan, ku shkuan për t’i bërë nderimet e fundit Papa Françeskut. Ishte biseda e parë ballë për ballë midis udhëheqësve që nga grindja në Shtëpinë e Bardhë që ndodhi gjatë vizitës së Zelensky-t në Shtetet e Bashkuara më 28 shkurt. Pas bisedimeve me Zelensky-n, Trump kritikoi përsëri Presidentin rus Vladimir Putin për ngurrimin e tij për të ndaluar luftimet.
Pasditen e 28 prillit, Kremlini njoftoi se Presidenti rus Vladimir Putin u kishte urdhëruar trupave ruse të ndërprisnin zjarrin në “80-vjetorin e Fitores” – nga mesnata e 8 majit deri në mesnatën e 11 majit.
Në përgjigje të vendimit të Putinit për të shpallur një armëpushim për disa ditë në maj, Shtëpia e Bardhë tha se Trump donte të shihte “jo një armëpushim të përkohshëm, por një të përhershëm”.
