Deputetja e Lidhjes Demokratike të Kosovës, Hykmete Bajrami, tha se partia e saj tashmë ka një qëndrim të formësuar sa i përket bashkëpunimit me Lëvizjen Vetëvendosje.
Ajo tha se çdo përgjigje zyrtare ndaj letrës së LVV-së do të vijë nga kryetari i LDK-së, i cili ka ekskluzivitetin për këtë çështje, raporton RTKlive.
“Letra i është dërguar kryetarit dhe ai vetë do të përgjigjet. Sigurisht, ai ka ekskluzivitetin t’i përgjigjet dhe juve se çka do të thotë për letrën. Mirëpo, Lidhja Demokratike e Kosovës ka tashmë një qëndrim të formësuar sa i përket bashkëpunimit me Lëvizjen Vetëvendosje. Ne nuk kemi qenë duke pritur letër për të formuluar qëndrimin, sepse ne e kemi tashmë qëndrimin,” tha Hykmete Bajrami nga LDK.
Quni: Qëndrimet do t’i shprehi në kryesi
Nënkryetari i LDK-së, Anton Quni, tha se qëndrimin e tij rreth letrës së LVV-së dërguar Abdixhiut, do ta shpreh në kryesi të partisë.
“Qëndrimin tim personal e shprehi në kryesi dhe pasi që ta bëjë publik në kryesi, mendimet, analizat, studimet, të mirat, rreziqet e të tjera i ndaj me shokët e mi, me kolegët e mi. Po ashtu i pranoj të gjitha këshillat, sugjerimet e të tjerëve dhe vijmë deri tek një vendim i përbashkët.”
Qun tha se kjo është një nga temat kryesore dhe se ata do të japin vlerësimet e tyre për këtë.
“Tani kjo është tema kryesore, do të thotë, në çdo takim formal ose joformal do të diskutohet. Natyrisht, ne japim vlerësimet tona, por përmbledhje të kryesisë ende nuk kemi njoftim,” tha Anton Quni.
Ndërsa, Lutfi Haziri dhe Kujtim Shala kanë hyrë në selinë qendore të LDK-së. Të dy kanë thënë shkurt se deklarohen pas takimit.
