Komisioni Evropian, si pjesë e paketës së 17-të të sanksioneve kundër Rusisë, propozoi vendosjen e kufizimeve kundër 60 individëve dhe organizatave, si dhe 150 cisternave të “flotës në hije”. Lajmin e raporton Bloomberg , duke cituar burime të tjera.
Sipas Financial Times, janë planifikuar kufizime kundër më shumë se 20 kompanive që besohet se po ndihmojnë Rusinë të shmangë sanksionet . Disa prej tyre ndodhen në vende të treta, përfshirë Emiratet e Bashkuara Arabe, Turqinë, Serbinë, Vietnamin dhe Uzbekistanin. Siç vëren gazeta, kjo do të jetë hera e parë që një kompani vietnameze i nënshtrohet sanksioneve të Brukselit për ndihmën ndaj Kremlinit.
Ministrat e jashtëm të BE-së duan të miratojnë një paketë të re sanksionesh deri më 20 maj, kur të takohen në Bruksel. Siç vëren Bloomberg, nëse miratohen kufizimet, numri i përgjithshëm i anijeve të “flotës në hije” të sanksionuara do të kalojë 300.Paketa e sanksioneve kërkon mbështetjen e të gjitha shteteve anëtare të BE-së që të miratohet, dhe masat kufizuese duhet të zgjaten çdo gjashtë muaj. Hungaria ka kërcënuar vazhdimisht se do të vërë veton ndaj këtyre masave. Siç raportoi më parë Bloomberg, BE-ja po shqyrton mënyra për të zgjeruar sanksionet pa kërkuar miratimin e të 27 shteteve anëtare.
