Ministrja në detyrë e Punëve të Jashtme, Donika Gërvalla, i ka reaguar kryetarit të Lidhjes Demokratike të Kosovës, Lumir Abdixhiku, për propozimin e tij për qeveri të transicionit.
Ajo ka thënë se mesazhi i Abdixhikut ishte se ai do që Partia Demokratike e Kosovës të jetë pjesë e qeverisë.
“Jo pa PDK-në, vetëm bashkë me PDK-në! Ky ishte mesazhi i sotëm i Lumir Abdixhikut, kryetarit të “Lidhjes së Re” dhe ideatorit të “Rrugës së Re”. Ja pse votuesi i LDK-së e ka braktisur këtë parti dhe këtë kryetar të përkohshëm”, ka shkruar Gërvalla në Facebook.
Sot gjatë ditës, Lidhja Demokratike e Kosovës ka propozuar qeveri të tranzicionit me të gjitha partitë shqiptare.
“Pra, LDK po kërkon unitet gjithëshqiptar në këtë periudhë dhe formimin e qeverisë nacionale të tranzicionit. Një qeveri me afat të caktuar deri në zgjedhjen e presidentit të ri, pra program, agjendë të qartë shtetërore të politikës së brendshme dhe të jashtme pa dallim dhe mbi të gjitha krijimin e një atmosfere që edhe e emancipon skenën politike, por edhe e edukon skenën politike dhe e shëron polarizimin e tanishëm” ka thënë Abdixhiku.
