Ministri në detyrë i Financave, Hekuran Murati, ka reaguar pas zgjedhjes së Friedrich Merz si Kancelar i Gjermanisë përmes një votimi të fshehtë në Bundestag, duke e cilësuar këtë si një formë demokratike që shpreh vullnetin e lirë të deputetëve.
“Me votim të fshehtë, Bundestagu Gjerman sapo votoi për Kancelarin Friedrich Merz. Votimi i fshehtë është formë demokratike për shprehje të vullnetit të lirë të deputetëve, dhe do të mundësonte zgjidhjen e ngërçit për konstituim të Kuvendit edhe tek ne,” shkroi Murati.
Ai kritikoi opozitën në Kosovë për bllokimin e procesit të konstituimit të Kuvendit, duke thënë se kjo bllokadë është “jashtë çdo arsyeje”.
Në reagimin e tij, Murati vlerësoi edhe sjelljen politike në Gjermani. “Është për t’u marrë shembull sjellja e partive gjermane, që, megjithëse votimi për Kancelar në herën e parë dështoi të prodhonte rezultat, askush nuk e bëri temë ndërrimin e kandidatit dhe askush nuk kërkoi qeveri tranzicioni,” theksoi ai.
