Shtetet e Bashkuara dhe rebelët huthi të Jemenit kanë arritur një marrëveshje armëpushimi të ndërmjetësuar nga Omani, tha Ministri i Jashtëm i sulltanatit, Badr bin Hamad Al Busaidi.
Sipas marrëveshjes, as SHBA-të dhe as rebelët Huthi nuk do të sulmojnë njëri-tjetrin, përfshirë anijet amerikane në Detin e Kuq dhe në Ngushticën Bab el-Mandeb. Deklarata e Omanit nuk përmendi nëse Huthitët kishin rënë dakord të ndalonin sulmet ndaj Izraelit.
Pak para njoftimit, Presidenti i SHBA-së Donald Trump tha se SHBA-të nuk do t’i bombardojnë më Huthitët.
“Houthit kanë njoftuar se nuk duan të luftojnë më. Ata thjesht nuk duan të luftojnë dhe ne do ta respektojmë këtë dhe do të ndalojmë bombardimet. Ata kanë kapitulluar… Ata thonë se nuk do të hedhin në erë anije të tjera”, tha Trump .Që prej shpërthimit të luftimeve në Rripin e Gazës në tetor 2023, rebelët Huthi, të cilët kontrollojnë pjesë të Jemenit, kanë filluar të synojnë ose të kapin anije të lidhura me Izraelin dhe aleatët e tij, përfshirë anijet luftarake amerikane që kishin ardhur në Lindjen e Mesme për të mbrojtur anijet. SHBA-të dhe aleatët e tyre u përgjigjën duke goditur bazat e rebelëve Huthi.
