Ministri gjerman i Mbrojtjes ka shkarkuar nga detyra gjeneralin Hartmut Renk, zëvendëskomandant i selisë së NATO-s për koordinimin e ndihmës për Ukrainën në Wiesbaden, sepse bëri komente të papërshtatshme në lidhje me përdhunimin në një takim, raportuan mediat gjermane.
Ministri gjerman i Mbrojtjes, Boris Pistorius, i cili u rizgjodh në këtë pozicion në qeverinë e re të Friedrich Merz të martën, i konsideroi akuzat kundër oficerit të rangut të lartë aq serioze saqë e shkarkoi menjëherë nga pozicioni i tij si zëvendëskomandant i selisë së sapoformuar të NATO-s për koordinimin e ndihmës për Ukrainën në Wiesbaden.
Siç raporton më tej faqja e internetit Der Spiegel, Renk do të dalë në pension të parakohshëm në vjeshtë.
Sipas mediave, gjatë një takimi me oficerë të lartë të NATO-s, Renk tha në një kontekst të panjohur: “Nëse përdhunimi është i pashmangshëm, relaksohuni dhe shijojeni”, pas së cilës dy përfaqësues të ushtrisë britanike e raportuan Renk në shërbimin disiplinor.
Në hetimin që pasoi, gjenerali gjerman tha se nuk e shqiptoi këtë fjali në kuptimin e mirëfilltë, por se “donte ta motivonte turmën me një thënie sarkastike-ironike”. Renk është oficeri i dytë gjerman i rangut të lartë që shkarkohet nga pozicione të rëndësishme brenda NATO-s. Vitin e kaluar, një gjeneral gjerman u largua nga selia e tij në Bruksel për shkak se kishte marrë me vete në shtëpi dosje konfidenciale.
