Presidenti i Serbisë, Aleksandar Vuçiq, ka udhëtuar sot në Moskë, ku më 9 maj do të marrë pjesë në Paradën e Fitores dhe do të takohet me presidentin rus, Vladimir Putin. Vizita ndodh në një moment të kritikave të shtuara nga Bashkimi Evropian për mungesën e reformave kyçe, mosvendosjen e sanksioneve ndaj Rusisë dhe, sipas vlerësimeve nga Brukseli, largimin gjithnjë më të theksuar të Serbisë nga vlerat evropiane.
Vuçiq u shfaq për herë të parë në publik këtë mëngjes, pasi gjatë fundjavës ndërpreu vizitën në Shtetet e Bashkuara të Amerikës për shkak të arsyeve shëndetësore. Para nisjes për në Moskë, ai u takua në Beograd me ambasadorin rus, Aleksandar Bocan-Harçenko.
Edhe pse konfirmimi zyrtar nga Presidenca e Serbisë ende nuk është publikuar, disa media në Beograd raportojnë se Vuçiq tashmë është nisur drejt kryeqytetit rus. Pjesëmarrja e tij në Paradën e Fitores, me të cilën shënohet 80-vjetori i përfundimit të Luftës së Dytë Botërore, do të shoqërohet edhe me një takim bilateral me presidentin Putin, ka konfirmuar ndihmësi i presidentit rus, Jurij Ushakov. Sipas tij, do të diskutohet për marrëdhëniet dypalëshe dhe situatën në Ballkanin Perëndimor.
Udhëtimi i Vuçiqit në Rusi ndodh në kohën e tensioneve të shtuara ndërmjet autoriteteve serbe dhe Bashkimit Evropian. Gjatë ditëve të fundit, disa zyrtarë evropianë kanë theksuar se marrëdhëniet me Moskën “nuk mund të vazhdojnë sikur të mos ketë ndodhur asgjë”, veçanërisht në kontekstin e agresionit rus kundër Ukrainës. Në të njëjtën kohë, janë paraqitur edhe informacione jozyrtare se Lituania dhe Letonia kanë refuzuar të lejojnë mbi-fluturimin e avionit presidencial të Serbisë.
Raportuesi i Parlamentit Evropian për Serbinë, Tonino Picula, gjatë një debati në PE deklaroi se “deklaratat për përkushtimin ndaj integrimeve evropiane janë të pabesueshme”, ndërkohë që planifikohet vizita në Moskë dhe nënshkrimi i marrëveshjeve të reja energjetike me Rusinë.
Pavarësisht kritikave, Vuçiq do të marrë pjesë në kremtimin në Moskë, ndërsa ministri i punëve të jashtme të Serbisë, Marko Gjuriq, ka thënë se presidenti më vonë “do të tregojë detajet mbi sjelljen e shteteve të ndryshme ndaj Serbisë”.
Analistët politikë vlerësojnë se Vuçiq me këtë vizitë dëshiron të tregojë se ai nuk është i varur vetëm nga BE-ja, por se ka edhe partnerë alternativë, si dhe se këtë vizitë e përdor për të forcuar pozicionin e tij në politikën e brendshme.
Vlerësohet gjithashtu se vizita në Moskë ndodh në një moment kur Brukseli po shpreh mbështetje për protestat studentore në Serbi dhe po i bën thirrje pushtetit të përmbushë reformat kyçe, përfshirë sundimin e ligjit dhe kushtet zgjedhore.
Serbia mbetet i vetmi vend kandidat për anëtarësim në BE që nuk e ka harmonizuar politikën e saj të jashtme me sanksionet e Bashkimit Evropian ndaj Rusisë, duke vazhduar të ruajë lidhje të ngushta politike dhe energjetike me Kremlinin.
