Autoritetet talibane në Afganistan e kanë ndaluar përkohësisht lojën e shahut, duke përmendur shqetësimet se loja mund të jetë një formë bixhozi. Siç njoftuan zyrtarët, ndalimi mbetet në fuqi deri në njoftim të mëtejshëm, domethënë derisa të përcaktohet “nëse shahu është në përputhje me ligjin islamik”.
Shahu është sporti i fundit në një seri sportesh që talebanët kanë vendosur t’i kufizojnë. Si kujtesë, në praktikë, grave u ndalohet pothuajse plotësisht të merren me sporte. Që kur u kthyen në pushtet në gusht të vitit 2021, talebanët kanë futur gradualisht ligje dhe rregullore që pasqyrojnë interpretimin e tyre të rreptë të ligjit të Sheriatit.
Të dielën, Atal Mashwani, një zëdhënës i drejtorisë sportive të talebanëve, tha se shahu konsiderohet një “mjet për bixhoz” sipas ligjit islamik.
“Ka dyshime fetare kur bëhet fjalë për shahun”, i tha ai AFP-së. “Derisa të sqarohen, loja e shahut në Afganistan mbetet e pezulluar.”
“Të rinjtë sot nuk kanë shumë mënyra për t’u argëtuar, kështu që vinin këtu çdo ditë”, tha Azizullah Gulzada. “Do të pinim çaj dhe do të luanim një lojë shahu me miqtë.” Ai shtoi gjithashtu se shahu luhet normalisht në shumë vende të tjera myslimane.
Vitin e kaluar, talebanët ndaluan gjithashtu artet marciale si MMA, duke argumentuar se ato janë shumë të dhunshme dhe të papajtueshme me parimet islame. “Është përcaktuar se ky sport është problematik në kontekstin e Sheriatit dhe përmban elementë të shumtë që bien ndesh me mësimet islame”, tha në atë kohë një zëdhënës i qeverisë së talebanëve. Garat e MMA-së u shfuqizuan në fakt në vitin 2021, kur u miratua një ligj që ndalon “goditjen me grusht në fytyrë”.
