Shkruan: Hyzri SALIHU
(Drejtuar Kryeministrit të Republikës së Shqipërisë, z. Edi Rama)
Shpallja “NON GRATA” e Aleksandar Vuçiqit
Domosdoshmëri morale, kombëtare dhe historike
Ka momente në historinë e një kombi kur heshtja bëhet tradhti, dhe kur veprimi është më shumë se nevojë – është detyrë historike.
Në emër të ndërgjegjes sonë kombëtare dhe të të gjithë shqiptarëve që nuk pranojnë të jetojnë me kujtesën e shtypur, me padrejtësinë e normalizuar dhe me gjenocidin e mohuar, ju drejtohem me thirrjen publike dhe institucionale që të shpallni Presidentin e Serbisë, Aleksandar Vuçiq, “person non grata” në Republikën e Shqipërisë.
Z. Vuçiq nuk është thjesht një udhëheqës i një shteti fqinj. Ai është pasardhës i drejtpërdrejtë politik dhe ideologjik i regjimit të Slobodan Millosheviqit – regjimit të gjenocidit, të spastrimeve etnike dhe të krimeve kundër njerëzimit.
Me duart e tij politike, ai ka ripërtërirë të njëjtën filozofi agresioni ndaj shqiptarëve – këtë herë jo vetëm me tanke, por me propagandë, diplomaci të rrejshme dhe mbështetje të strukturave destabilizuese në Kosovë.
Kryeministër:
A mund të pranojë Shqipëria që në truallin e saj të shkelë një njeri që nderon terroristët që vrasin policë të Kosovës?
A mund të heshtë Tirana kur në Beograd shpallet ditë zie për vrasësit e përfaqësuesve të shtetit të Kosovës?
A ka dinjitet pa reagim? A ka bashkim kombëtar pa vija të kuqe morale? Nëse ka një vijë që nuk guxojmë ta kapërcejmë, ajo është pranimi në heshtje i fyerjes kombëtare. Shpallja e Aleksandar Vuçiqit “non grata” nuk është akt hakmarrjeje – është akt vetëdijeje dhe mbrojtjeje kombëtare. Është një vendim që konfirmon: Shqiptarët nuk harrojnë, nuk përkulen dhe nuk pranojnë që krimi të kthehet në politikë të pranueshme. Ju ftoj zyrtarisht të ndërmerrni këtë hap të domosdoshëm dhe historik.
Bëjeni për Kosovën, për Prekazin, për Reçakun, për Gjakovën, për familjet që ende kërkojnë drejtësi.
Bëjeni për Shqipërinë që nuk guxon të heshtë përballë padrejtësisë. Çdo ditë që Aleksandar Vuçiq nuk shpallet “non grata” në Shqipëri, është një ditë në të cilën historia do të na gjykojë për dobësi.
Me përgjegjësi të plotë filozofike, morale dhe kombëtare.
