Komandanti i KFOR-it, Enrico Barduani, ka pritur sot në kampin “Film City” në Prishtinë ambasadorët e të gjitha vendeve kontribuuese të këtij misioni.
Përmes një njoftimi, KFOR-i ka bërë të ditur se në takim është diskutuar për trendët e sigurisë në rajon, situatën pas zgjedhjeve në Kosovë dhe aktivitetet e këtij misioni.
“Diskutimi në këtë takim mbuloi një gamë të gjerë temash, duke përfshirë trendet e sigurisë në të gjithë rajonin, situatën në Kosovë pas zgjedhjeve parlamentare në shkurt, takimin e fundit të komandantit të KFOR-it me Përfaqësuesin Special të BE-së, Peter Sorensen, dhe aktivitetet dhe bashkëpunimin e KFOR-it me komunitetin ndërkombëtar”, thuhet në njoftim.
Tutje theksohet se të gjithë pjesëmarrësit përsëritën rolin kryesor të luajtur nga KFOR-i në mbështetje të stabilitetit rajonal dhe rëndësinë e unitetit të përpjekjeve drejt sigurisë së qëndrueshme për të mirën e të gjitha komuniteteve.
KFOR-i përsëriti se vazhdon të kontribuojë për një mjedis të sigurt për të gjithë njerëzit dhe komunitetet që jetojnë në Kosovë.
