Një nga kameramanët e BBC-së në Gaza u plagos gjatë një sulmi ajror izraelit në parkingun përpara Spitalit Evropian në Khan Younis. Edhe pse ai shpëtoi pa lëndime serioze, sulmi la pas dhjetëra civilë të vdekur dhe të plagosur.
Sulmi ndodhi në një kohë kur familjet ishin në spital duke pritur evakuimin e fëmijëve të tyre të sëmurë, si dhe ata që kishin ardhur për të marrë fëmijët që po ktheheshin nga trajtimi jashtë vendit.
Ushtria izraelite pretendon se një qendër komande e Hamasit ndodhej nën spital, duke deklaruar se është kryer një “sulm preciz” dhe duke akuzuar Hamasin për përdorimin e civilëve si mburoja njerëzore. Hamasi i mohoi këto akuza.
BBC nuk e ka zbuluar identitetin e kameramanit të saj për arsye sigurie, por është konfirmuar se ai ishte me njërin nga baballarët në kohën e sulmit, i cili u plagos dhe më vonë u lirua nga spitali. Në videot që ai regjistroi, ai mund të shihet duke u përpjekur të ngushëllojë fëmijët e tmerruar të burrit të plagosur.
Ditët e fundit, kameramani ka punuar për dokumentimin e gjendjes së fëmijëve të kequshqyer në Gaza, ndër të cilët është edhe Siwar Ashour, pesë muajsh. Historia e saj e preku thellë ekipin e BBC-së. Vajza është shumë e kequshqyer, me alergji serioze dhe probleme gastrointestinale. Nëna e saj, Najwa, nga dhoma e spitalit në Spitalin Nasser, i dërgoi një mesazh publikut duke thënë se dëshiron vetëm që vajza e saj të shërohet, të luajë si fëmijët e tjerë dhe të shtojë përsëri në peshë.
Ndërkohë, Siwar zhvilloi një infeksion të lëkurës dhe plagë të hapura në duar. Shëndeti i saj po përkeqësohet dita-ditës dhe burimi i vetëm i ushqimit është formula speciale e qumështit, e cila është e vështirë të sigurohet në Gaza. Mjekët në Spitalin Fushor Jordanez arritën të gjenin një sasi të vogël të formulës dhe pritet të dërgojnë më shumë.
Ndërkohë, në bashkëpunim me autoritetet izraelite, vazhdon evakuimi i fëmijëve të sëmurë rëndë nga Gaza në Jordani dhe Emiratet e Bashkuara Arabe. Familjet që shoqërojnë fëmijët i nënshtrohen kontrolleve të sigurisë. Midis atyre që janë transferuar tashmë në Jordani është Abdelrahman al-Nashash, një djalë që humbi këmbën në sulmin izraelit. Ai ka qëndruar me nënën e tij, Asmën, në një strehim të sigurt në Aman për katër muaj, ku po merr kujdes mjekësor.
Gjatë një vizite të kohëve të fundit, ekipi i BBC-së dëshmoi thirrjen e tyre drejtuar familjes në Gaza. Gjyshja e djalit përshkroi tmerret e përditshme të luftës: mungesën e ushqimit, çmimet e larta dhe predhat që bien rreth tyre çdo ditë. Fëmijët i përshëndetën nënës së tyre përmes ekranit dhe Asma shpërtheu në lot pas bisedës, duke thënë se e vetmja gjë që donte ishte të kthehej në shtëpi dhe të gjente familjen e saj gjallë e mirë.
Mund ta shikoni regjistrimin këtu.
