Kryetari i Lidhjes Demokratike të Kosovës, Lumir Abdixhiku, pas takimit të liderëve me presidenten Vjosa Osmani i ka bërë thirrje Lëvizjes Vetëvendosje që të dalë me një zgjidhje për ngërçin politik në të cilin është futur vendi.
Ai ka thënë se subjekti që drejton nuk është i interesuar të vazhdojë me mbledhjet e Kuvendit çdo 48 orë pa rezultat, derisa ka thënë se është mirë që sa më parë presidentja të shqyrtojë dërgimin e kësaj çështjeje në Kushtetuese.
“Sot patëm një takim konsultativ të thirrur nga presidentja e Kosovës, pas së cilit takim kryesisht partitë politike qëndruan në pozicionet e tyre paraprake, që nënkupton se nuk ka ndonjë zgjidhje eventuale për ngërçin politik, e as nuk ka ndonjë iniciativë që do ta zhbllokojë këtë gjendje të tanishme. Kjo është për keqardhje sepse gjendja e tanishme 16 herë përsëritje, një muaj vonesë dhe më së paku iniciativë nga partia e parë që ka 48 deputetë, e nënkupton që nuk ka as brengë e siç e pashë në takim, e as urgjencë që kjo çështje të zgjidhet sa më parë”, tha ai.
Abdixhiku tutje tha se në këtë takim ka propozuar dhe elaboruar idenë e qeverisë gjithëpërfshirëse për një periudhë të shkurtër kalimtare, me agjendë të qartë dhe me pika të qarta të definuara ndërpartiake.
“Jam i lumtur që kishte një reflektim pozitiv nga partitë e tjera në përmasën e konsiderimit, madje edhe pjesëmarrjes, përjashto partinë e parë, e cila nuk kishte as pozicion të qartë, por as ide se si të dilet nga kjo gjendje”, shtoi ai.
Ai tha se kryesia e LDK-së do të mblidhet sot.
“Nuk jemi të interesuar të vazhdojmë me cirkun e çdo 48 orëve të mbledhjes. Është mirë që sa më parë presidentja të shqyrtojë dërgimin e kësaj çështjeje në Kushtetuese. Bllokada në Kuvend po ndodh sepse asnjëra parti nuk e ka shumicën. Partia e parë ka bllokuar kuvendin, nuk ec tutje për shkak të krizës procedurale, por në thelb kriza është politike. Asnjëra nuk ka shumicë politike në Kuvend, po të kishte shumicë do të zgjidheshin të gjitha çështjet”, nënvizoi Abdixhiku.
Ai u shpreh se takimi i sotëm nuk kishte asnjë efekt konkret: “Asnjë propozim, asnjë lëvizje nga dëshira partiake. U mblodhëm për gjëra që tashmë i dimë. Si i tillë, ky takim nuk pati kurrfarë kuptimi”, tha ai.
Abdixhiku shtoi se zgjidhja nuk mund të vijë nga presidentja, por është në dorën e vullnetit politik të partive. “Presidentja nuk jep zgjidhje. Gjithsesi kryetar i Lëvizjes Vetëvendosje, ka të drejtën e formimit të shumicës. Pretendon se mund ta bëj, le ta bëjë. Ajo çka me habiti shumë ishte fakti që na tha se ‘s’ka asnjë urgjencë, kjo pritje është më shumë çështje mediatike e jo e popullit të Kosovës’. E me këtë s’pajtohem fare, është çështje shumë urgjente. Ta lësh vendin pa institucione dhe të mblidhesh 16 herë pa asnjë rezultat, dhe pa asnjë shpresë në horizont, është çështje shumë urgjente. Dhe fakti që nuk e kupton që është urgjente, është edhe më shqetësuese”, tha kreu i LDK-së.
