Gjykata Themelore në Prishtinë ka njoftuar se ka aprovuar kërkesën e Prokurorisë për t`iu caktuar masën e arrestit shtëpiak dy të pandehurave, K.B. dhe Q.M.B., në një periudhë prej një muaji për secilën.
Në njoftimin e gjykatës thuhet se, pas seancës dëgjimore, gjyqtarja e procedurës paraprake ka vlerësuar se janë përmbushur kushtet ligjore për caktimin e masës së arrestit shtëpiak, pasi ekziston dyshimi i bazuar se të pandehurat kanë kryer veprën penale “Përvetësimi në detyrë”.
“Të pandehurat K.A. dhe Q.M.B. janë të obliguara të qëndrojnë në shtëpitë e tyre dhe në asnjë rast, pa leje të gjykatës, nuk guxojnë të largohen nga shtëpia. Po ashtu, Policia e Kosovës është e detyruar të verifikojë zbatimin e kësaj mase dhe, në rast të mosrespektimit, ta informojë gjyqtaren e procedurës paraprake. Sipas nenit 181, paragrafi 5 të KPPRK-së, gjykata mund të caktojë masën më të rëndë – paraburgimin, nëse të pandehurat nuk e respektojnë këtë masë,” thuhet në njoftim.
Gjykata ka konstatuar se ka dyshime të bazuara që, nëse të pandehurat gjenden në liri, mund të pengojnë rrjedhën normale të procedurës penale, duke asgjësuar, fshehur ose ndikuar në dëshmitarët dhe provat materiale. Kjo do të cenonte rëndë zhvillimin e procedurës penale.
Gjykata ka vlerësuar gjithashtu se masa e arrestit shtëpiak është caktuar edhe për shkak të peshës së veprës penale, si dhe rrethanave në të cilat dyshohet se është kryer vepra penale. Sipas gjykatës, dyshimet janë të bazuara në faktin që bëhet fjalë për përvetësim të parave që Komuna e Prishtinës i kishte besuar për subvencionimin e fëmijëve që i plotësojnë kriteret ligjore për subvencionim. Gjithashtu, është marrë parasysh dëmi i mundshëm prej mbi 51 mijë euro, i shkaktuar buxhetit të Komunës, si dhe veprimet inkriminuese të të pandehurave që dyshohet se kanë përgatitur listat e përfituesve dhe i kanë dërguar në Komunën e Prishtinës.
Kundër këtij aktvendimi, palët e pakënaqura kanë të drejtë të ankohen në Gjykatën e Apelit, përmes Gjykatës Themelore në Prishtinë.
