Kryetari i Komunës së Mitrovicës së Veriut, Erden Atiq, ka bërë të ditur se në bashkëpunim me Policinë e Kosovës janë ndërmarrë hapa konkretë për rikthimin e objekteve publike të uzurpuara nga strukturat ilegale serbe, duke i kthyer ato nën menaxhimin legjitim komunal.
“Në bashkëpunim me Policinë e Kosovës, janë ndërmarrë hapa konkretë për rikthimin e objekteve të uzurpuara nga strukturat ilegale serbe nën menaxhimin legjitim komunal,” ka shkruar Atiq në një postim në rrjetet sociale.
Sipas tij, tashmë janë liruar dhe kthyer në administrimin e Komunës:
– objekti katërkatësh në rrugën Kollashini, ku ishin të vendosura: Instituti për Sport, Rini dhe Shërbime të Specializuara, Shoqata Sportive dhe SHKA “Kosova Bozhur”;
– Muzeu i Qytetit në rrugën Lole Ribar;
– Qendra Sportive në rrugën Llola Ribar, afër ish-remontit.
Atiq thekson se “këto veprime janë ndërmarrë me qëllim të vendosjes së ligjshmërisë, forcimit të institucioneve lokale dhe garantimit të një të ardhme të përbashkët dhe të sigurt për të gjithë qytetarët, si dhe kthimit të hapësirave publike në shërbim të komunitetit.”
Lidhur me këtë ka reaguar ministri në detyrë i Punëve të Brendshme, Xhelal Sveçla, i cili ka thënë se nga këto ambiente institucionet e vendit do të ofrojnë shërbime për qytetarët pa dallim.
“Asetet që i kanë takuar gjithmonë Komunës së Republikës sonë e janë mbajtur peng i strukturave paralele ilegale të Serbisë, po i kthehen përfundimisht Komunës”, ka shkruar Sveçla.
