Kryetari i Lidhjes Demokratike të Kosovës, Lumir Abdixhiku, ka reaguar sot përmes një postimi në Facebook lidhur me Samitin e Komunitetit Politik Evropian që po mbahet në Tiranë me pjesëmarrjen e 47 liderëve të Evropës.
Abdixhiku ka shprehur shqetësimin që Kosova po mbetet e izoluar, pa institucione funksionale dhe pa ndjenjën e urgjencës që kërkon koha.
“Evropa sot po zbarkon në Tiranë. E gjitha. Me plot 47 liderët e saj. Në Tiranën që tashmë, si epiqendër e re rajonale, është bërë shtëpi nga ku po gdhendet e ardhmja e vet kontinentit. Në këtë të ardhme, pa dyshim, po i bëhet vendi dhe vendit të shqipeve. Kosova, ndërsa, vazhdon të mbetet nën masa e sanksione. Vazhdon të mbetet dhe pa institucione. Mbi të gjitha, vazhdon të mbetet pa ndjenjën e urgjencës për kohën. Nuk ka urgjencë mu tha”, ka shkruar Abdixhiku, duke aluduar në ato që sipas tij i tha kryetari i Lëvizjes Vetëvendosje, Albin Kurti, në takimin e liderëve të partive te presidentja Vjosa Osmani.
Ai tutje ka thënë se zhvillimi, mirëqenia dhe progresi janë të paarritshëm për ata që kanë uzurpuar të ardhmen e vendit, sepse për ta, siç shprehet ai “shijimi i jetës së pushtetit është vet qëllimi, të tjerat presin”.
Tutje Abdixhiku ka shtuar se rizgjimi kombëtar ndonjëherë kërkon kohë, “por sot ky rizgjim Kosove kërkon urgjencë”.
“Kjo urgjencë nuk vjen nga ata që nuk e njohin nevojën. Vjen nga populli i Kosovës që rizgjohet”, ka shtuar kreu i LDK-së.
