Bashkimi Evropian ka shprehur shqetësim për operacionet e fundit të policisë së Kosovës, inspektimet dhe mbylljet e shërbimeve publike, duke theksuar se ato “rrezikojnë të përkeqësojnë tensionet dhe të ndikojnë negativisht në jetën e përditshme të komuniteteve lokale, si dhe të dëmtojnë pozitat ndërkombëtare të Kosovës.”
“Ne jemi veçanërisht të shqetësuar për operacionet kundër kompanisë Vodovod Ibar në Mitrovicën e Veriut dhe plantës së furnizimit me ujë dhe kompanisë publike në Zubin Potok, të cilat ofrojnë shërbime publike bazë për komunitetet që jetojnë në pjesën veriore të Kosovës”, thuhet në reagim.
Në reagim BE thotë se veprimet njëanshëm dhe të pa-koordinuara dëmtojnë përpjekjet për ndërtimin e besimit mes komuniteteve.
Bashkimi Evropian i ka bërë thirrje kryeministrit në detyrë, Albin Kurti dhe autoriteteve në Kosovë që të “ndalin këto mbyllje, të ushtrojnë përmbajtje dhe të shmangin masa eskaluese.”
BE-ja ka kërkuar që të dyja palët, Kosova dhe Serbia, “të angazhohen konstruktivisht në zbatimin e Dialogut të lehtësuar nga BE-ja, Marrëveshjes për rrugën e normalizimit dhe Aneksit të Zbatimit, si dhe marrëveshjeve të tjera të arritura në kuadër të dialogut të lehtësuar nga BE-ja, pa vonesa dhe kushte të mëtejshme”. “Kjo përfshin krijimin e Asociacionit të komunave me shumicë serbe”, theksohet në reagim, duke shtuar se normalizimi i marrëdhënieve është një kusht thelbësor për rrugën evropiane të të dyja palëve.
