Presidenti i Këshillit Evropian, Antonio Costa deklaroi sot në fjalën e seancës së parë plenare të Samitit të Komunitetit Politik Evropian në Tiranë se, “titulli i takimit të sotëm është me të vërtetë me vend “një Europë e re në një botë të re”. Unë besoj që kjo është ҫështja kryesore për këtë samit të sotëm. Pra ҫfarë është Europa? Cili është roli i saj në këtë botë të re?”.
Costa tha se pas fundit të Luftës së Dytë Botërore “ne ndërtuam një rend të ri botëror të bazuar tek Karta e OKB-së, tek e drejta ndërkombëtare si edhe bashkëpunimi ndërkombëtar dhe ai tregtar”.
“Sigurisht që ai rend ndërkombëtar nuk ishte i përkorë por na ofroi një kuadër shumë të mirë për paqen për begatinë në rritje, në veçanti këtu në Europë”, shtoi ai.
“Tashmë ky rend botëror i bazuar tek rregullat, pra po minohet nga shumë palë. Agresioni rus kundër Ukrainës solli luftën e madhe në kontinentin evropian sërish dhe kjo luftë është një sulm ndaj komunitetit ndërkombëtar, ndaj të gjitha parimeve, të cilat ne i kemi fort përzemër si sovranitetin kombëtar, si edhe funksionimi i kufijve ndërkombëtarë dhe integriteti territorial i vendeve tona”, tha ai.
Duke folur për situatën në Gazë, Costa u shpreh se, “është një situatë që është një tragjedi humanitare. Pra, e drejta ndërkombëtare po dhunohet kur njerëzit po sulmohen me forcë të zhdrejtë”.
“Për dekada bashkëpunimi ndërkombëtar dhe ai tregtar ka bërë që njerëzit të lidhen me njëri-tjetrin dhe të ketë më begati. Ndërkohë që kjo ndërvarësi që ne kishim krijuar është shndërruar në një instrument pushteti dhe presioni”, tha Costa.
Nga ana tjetër, shtoi presidenti i Këshillit Evropian, “mënyra sesi ne kemi funksionuar me rendin shumëpalësh ka bërë që ne të kishim, paqe, siguri, pavarësisht ndryshimeve klimaterike kemi promovuar të drejtat e njeriut, të gjitha këto ҫështje të cilat mund të avancohen përpara vetëm nëse ne bashkëpunojmë në formë kolektive”.
“Megjithatë rendi shumëpalësh vazhdon të sulmohet ngahera dhe në mënyrë të vazhdueshme dhe Europa ka detyrë të punojë për këtë ҫështje. Ne duhet të jemi të bashkuar dhe Europa duhet t’ia dalë mbanë për të sjellë një paqe të drejtë dhe kohëgjatë për Ukrainën”, u shpreh Costa.
Duke iu drejtua presidenti Ukrainas Zelensky, Costa theksoi se , “ne e dimë i dashur Volodymyr që siguria juaj është edhe siguria jonë. Europa gjithashtu duhet të investojë më shumë tek mbrojtja e saj, sepse ne kemi mësuar që paqja pa mbrojtje është iluzion”.
“Europa duhet t’ia dalë mbanë për të krijuar kushtet e duhura për të patur zgjidhjen e duhur për paqe në Lindjen e Mesme sepse në rast se nuk e bëjmë këtë kështu do të minohet, jo vetëm siguria e gjithë Europës dhe vendeve të tjera fqinje, por edhe autoriteti i saj. Europa duhet t’ia dalë mbanë për të thelluar, por edhe për të zgjeruar rrjetet e saj të tregtisë botërore dhe të begatisë”, tha Costa.
“Ne nuk duhet t’i jepemi tundimit të proteksionizmit por duhet të kemi partneritete dhe duhet të shmangim mentalitetin me shumatoren zero. Europa duhet t’ia dalë mbanë pra për të mbrojtur rendin shumëpalësh duke udhëhequr edhe me anën e paktit për të ardhmen. Duke respektuar marrëveshjen e Parisit për ndryshimet klimaterike, duke mbrojtur oqeanet si një e mirë globale për të gjithë dhe sigurisht duke vazhduar të jetë një shtyllë e fortë dhe mbështetëse e OKB-së dhe Europa ka për t’ia dalë mbanë”, tha Costa.
Costa nënvizoi se, “BE është gati dhe i gatshëm që të luajë këtë rol të plotë në këtë Europë të re në këtë botë të re duke punuar nga afër me të gjithë partnerët tanë Europianë”.
“BE-ja e re do të jetë një partner i besueshmë për integrimin europian, por edhe për bashkëpunimin për energjinë, për sigurinë, për mbrojtjen, për të mbrojtur klimën”, theksoi ai.
“Duhet përdorur kjo energji, ky motivim pikërisht për të ardhmen e fëmijëve dhe energjinë e mikut tonë Edi Rama që të punojmë së bashku si europianë”, përfundoi Presidenti i Këshillit Evropian, Antonio Costa. /ata
