Në përvjetorin e 26-të të zhdukjes së Ukshin Hotit, kryeministri në detyrë, Albin Kurti, ka kujtuar figurën e profesorit, politikanit dhe mendimtarit të shquar, i cili u zhduk me dhunë nga autoritetet serbe më 16 maj 1999, teksa ka paraqitur edhe disa dokumente të asaj kohe.
Në postimin e tij, Kurti ka përshkruar me hollësi rrethanat e zhdukjes së Ukshin Hotit, duke theksuar: “Ukshin Hoti u arrestua më 1994 dhe u dënua për aktivitetin politik të tij me 5 vite burgosje. Dënimi i tij do të merrte fund më 17 maj 1999, por një ditë më herët, më 16 maj, autoritetet e Burgut të Dubravës ku ai po e vuante dënimin e nxorën nga burgu dhe e zhdukën”, shkroi Kurti.
Ai ka sjellë në vëmendje dokumentin zyrtar të lirimit të Ukshin Hotit me numër protokolli 24-2241-05, të nënshkruar nga Drejtori i Burgut të Dubravës, Aleksandër Rakoçeviq, si dhe një letër të shkruar me dorë nga autoritetet e burgut ku figuron emri i Hotit, fillimisht i renditur, por më pas i fshirë me laps, me vërejtjen: “ka mbaruar dënimin”.
“Ukshin Hoti u nxor prej dhomës së burgut nga mbikëqyrësi Branko Komatina, duke mbajtur me vete vetëm një thes me gjërat e tij personale dhe prej asaj dite nuk dihet asgjë për të”, shtoi Kurti.
Ai ka theksuar përfshirjen e zyrtarëve serbë në këtë zhdukje të qëllimshme, duke thënë:
“Këtu është karta e identitetit të mbikëqyrësit Branko Komatina dhe e drejtorit të burgut, Aleksandër Rakoçeviq, si dy nga personat e përfshirë në skenarin e zhdukjes së Ukshin Hotit. Por emrat e zyrtarëve shtetërorë serbë të përfshirë në këtë rast, ndjekin një zinxhir që shkon deri te nivelet e larta ministrore dhe qeveritare të Serbisë”.
Tutje Kurti theksoi se dita e lirimit të Hotit nuk ishte një ditë gëzimi, por e dhimbjes:
“16 maji i vitit 1999, dita e lirimit të Ukshin Hotit nuk ishte dita e daljes së tij në liri, por dita e zhdukjes së tij”.
Duke e cilësuar atë si një nga personat e zhdukur me dhunë nga autoritetet shtetërore të Serbisë gjatë luftës në Kosovë, Kurti përkujton edhe masakrën që ndodhi më pas në Burgun e Dubravës:
“Në ditët pasuese pas zhdukjes së Ukshin Hotit, autoritetet shtetërore të Serbisë kryen një masakër të madhe dhe të llahtarshme ndaj të burgosurve shqiptarë në Burgun e Dubravës, një tjetër krim shtetëror ky i Serbisë”.
Pavarësisht publikimit të dokumenteve dhe dëshmive të shumta që nga viti 2011, Kurti shpreh zhgënjimin për mungesën e veprimit institucional në Kosovë: “Megjithëse këto dokumente sikur edhe të tjera relevante janë publikuar që në vitin 2011 nga Ukë Thaçi në librin ‘Masakra në burgun e Dubravës’ dhe megjithëse shumë të burgosur të tjerë në Burgun e Dubravës atë kohë, kanë dëshmuar për rrethanat e zhdukjes së Ukshin Hotit, sistemi prokurorial dhe gjyqësor i Kosovës, nuk ka ngritur aktakuzë qoftë dhe në mungesë të të dyshuarve, për rastin e Ukshin Hotit”.
Kryeministri në detyrë e quan këtë neglizhencë institucionale si një boshllëk të dhimbshëm në rrugën drejt drejtësisë: “Mungesa e veprimit nga Prokuroria Speciale e Kosovës mbetet boshllëk i dhimbshëm në përpjekjen tonë kolektive për drejtësi dhe për të vërtetën. Institucionet tona të drejtësisë e kanë obligim moral dhe kushtetues që të veprojnë me përgjegjësi, për të mos lejuar që harresa ta zëvendësojë drejtësinë. Republika e Kosovës kërkon zbardhjen e plotë të rastit të zhdukjes së Ukshin Hotit dhe drejtësi për të, sikur edhe për të gjithë të zhdukurit e tjerë me dhunë. Politikani e profesori Ukshin Hoti do të mbetet një nga figurat më të rëndësishme të historisë së Kosovës e unike të mendimit politik shqiptar”, përfundoi Kurti.
