Presidentja e Kosovës, Vjosa Osmani ka thënë se pavarësisht mungesës së themelimit të institucioneve të reja, Kosova ende ka kryenegociatorin Besnik Bislimi, në rast të ftesës për takim nga Bashkimi Evropian për dialogun me Serbinë.
“Megjithatë sa i përket kryenegociatorit, Kosova ka kryenegociatorin që akoma është fuqiplotë. Është zëvendëskryeministri i parë, i cili nuk ka kandiduar apo zgjedhur deputet. Pra, ka kompetenca në mënyrë që të vazhdojë nëse kërkohet nga BE që të ketë një takim mes kryenegociatorësh”, ka thënë Osmani nga Tirana.
E pyetur për situatën politike në vend, ajo ka inkurajuar liderët e Kosovës në formimin e institucioneve.
“Besoj se do të ketë përpjekje akoma dhe i inkurajoj liderët politikë që për interes të qytetarëve dhe të Kosovës, në mënyrë që të mos humbasim dhe të dëmtohemi më shumë, të kemi institucione sa më parë që të jetë e mundur”, ka potencuar ajo.
Osmani nga Samiti i Komitetit Politik në Tiranë, ka thënë se pret nga kryeministri Edi Rama që të jetë i zëshëm për heqjen e masave sanksionuese të BE-së ndaj Kosovës dhe për sigurimin e njohjeve ndaj Kosovës, veçanërisht nga pesëshja anëtare e familjes evropiane.
