ATSH/ Në Tiranë zhvillohet sot Samiti Politik Europian nën logon “New Europe in a new World”, duke shënuar takimin e tij për herë të parë në Ballkanin Perëndimor.
Pas pritjes nga kryeministri Edi Rama në sheshin “Skënderbej” të liderëve dhe kryetarëve të shteteve dhe qeverive nga 47 vende europiane, samiti nisi me një ceremoni hapëse në Teatrin e Operës dhe Baletit me një video prezantuese nga punimet e realizuara nga nxënësit e shkollave të Shqipërisë, të cilat janë vendosur në “Shtëpinë e Europës”, ku do të zhvillohen edhe punimet e samitit.
Më pas u shfaq një video me pamje nga figurat e njohura të historisë shqiptare, që kanë dhënë kontribut në pavarësinë e Shqipërisë.
Pjesë e hapjes së samitit ishin edhe performancat e valleve tradicionale shqiptare si dhe interpretimi në violinë i këngës “Zjerm” nga Shkodra Elektronike, e cila u kualifikua në finalen e Festivalit Europian të Këngës që do të zhvillohet nesër në Zvicër.
Një moment argëtues ishte edhe urimi i liderëve europianë “Mirësevini në Shqipëri” nëpërmjet Inteligjencës Artificiale.
Samiti do të vijojë përgjatë ditës me seancat plenare dhe tryezat e diskutimeve.
