Ish-drejtori i FBI-së, James Comey, është thirrur për t’u marrë në pyetje nga Shërbimi Sekret për të shpjeguar një postim në rrjetet sociale që mbështetësit e Donald Trump e konsiderojnë si kërcënim për presidentin.
Shërbimi Sekret, i cili është përgjegjës për sigurinë e presidentit, e mori në pyetje Comey-n në një zyrë në terren në Uashington të premten pasdite, sipas një zyrtari të Shërbimit Sekret i cili foli në kushte anonimiteti.
Biseda zgjati rreth një orë, tha zyrtari, dhe Comey u paraqit vullnetarisht pasi iu kërkua të vinte. Të enjten, Comey postoi në Instagram një foto të guaskave në rërë që formonin numrin 8647 me mbishkrimin: “Formacion i mrekullueshëm guaskash gjatë shëtitjes sime në plazh”.
Comey e hoqi postimin
Në zhargonin amerikan, numri 86 mund të përdoret si folje që do të thotë të nxirrni dikë nga një bar sepse është i dehur ose ka prishur rregullat. Numri 47, nga ana tjetër, tregon për Trumpin – presidentin e 47-të të Shteteve të Bashkuara.
Comey, i cili u shkarkua nga Trump në vitin 2017, e hoqi postimin pas një reagimi të ashpër nga mbështetësit e Trump, duke theksuar se ai kundërshton dhunën e çdo lloji. Disa mbështetës të Trump e interpretuan mesazhin si një thirrje për largimin e dhunshëm të Trump nga detyra, përfshirë vrasjen.
Vetë Trump e akuzoi Comey-n se kishte bërë thirrje për vrasjen e tij, duke hedhur poshtë pretendimin e ish-drejtorit të FBI-së se ai nuk ishte në dijeni të ndonjë konotacioni të dhunshëm. “Ai e dinte saktësisht se çfarë do të thoshte”, tha Trump në një intervistë me Fox News përpara se të largohej nga Abu Dhabi pas një udhëtimi katër-ditor në Lindjen e Mesme.
Gabbard: Kjo ishte një thirrje e fshehur për veprim
Numrat “8647” dhe “8646” u përdorën si slogane politike dhe në bluza gjatë administratave të Trump dhe paraardhësit të tij, Presidentit Demokrat Joe Biden, presidentit të 46-të të SHBA-së. Numri 86 u përdor gjithashtu si kod nga republikanët të cilët kërkuan shkarkimin e Joe Biden dhe mbanin mbishkrimin “8646” në bluzat e tyre, i cili ishte një thirrje për shkarkimin e Biden – presidentit të 46-të.
Trump njoftoi se do t’ia linte veprimet e mëtejshme mbi këtë çështje Prokurores së Përgjithshme Pam Bondi dhe të tjerëve. Drejtori i Shërbimit Sekret të SHBA-së, Sean Curran, po “udhëheq një hetim mbi këtë kërcënim”, konfirmoi për Fox News të enjten në mbrëmje Drejtoresha e Inteligjencës Kombëtare, Tulsi Gabbard.
Gabbard e hodhi poshtë shpjegimin e Comey si absurd dhe tha se slogani “8647” u përdor nga protestuesit anti-Trump dhe ishte një thirrje e maskuar për veprim kundër presidentit aktual. Në fillim të mandatit të tij të parë, Trump shkarkoi Comey-n, i cili si drejtor i FBI-së po drejtonte hetimin për ndërhyrjen e mundshme ruse në zgjedhjet presidenciale të vitit 2016.
