Bashkimi ka arritur fitore të madhe në finalen e pestë të “Play-off”-it të Superligës së Kosovës në basketboll, duke mposhtur Trepçën me rezultat 85-77 në një atmosferë të zjarrtë në palestrën “Sezai Surroi”.
Dueli ndërmjet dy rivalëve të vjetër në vendin tonë, ka prodhuar një superndeshje me ritëm të lartë dhe emocione nga fillimi deri në fund.
Pjesa e parë nisi më mirë për skuadrën nga Mitrovica, Trepçën, që e fitoi çerekun e parë me shifrat 23-19. Por në periodën e dytë, vendasit u rikthyen fuqishëm dhe përmbysën rezultatin me një çerek dominues prej 29-19.
Çereku i tretë ishte i baraspeshuar, me Trepçën që arriti të ruajë një epërsi minimale (17-18), por gjithçka u vendos në dhjetë minutat e fundit. Bashkimi shfaqi karakter dhe vendosmëri, duke e fituar këtë periudhë dhe ndeshjen me rezultatin përfundimtar 85-77.
Me këtë fitore, seria finale shkon në 3-2 në të mirë të Trepçës. Tani gjithçka mbetet e hapur, teksa skuadra që arrin katër fitore do të shpallet kampione e Kosovës.
Trepça synon të mbrojë titullin kampion, ndërsa Bashkimi është në kërkim të trofeut të parë që nga viti 2018.
Ndeshja e gjashtë pritet të jetë vendimtare dhe të dhurojë spektakël të vërtetë për tifozët e basketbollit kosovar.
