Kryetari i Komunës së Prishtinës, Përparim Rama, ka reaguar sërish ndaj menaxhmentit të ndërmarrjes publike “Pastrimi”, duke e akuzuar për dështim sistematik në përmbushjen e misionit të saj, si dhe për keqpërdorim të fondeve publike.
Përmes një postimi në Facebook, Rama ka bërë të ditur se Komuna ka investuar mbi 12 milionë euro në këtë ndërmarrje për të hyra dhe subvencione, përfshirë 1.4 milionë euro për blerjen e kamionëve të rinj dhe 3,800 kontejnerë të rinj, të financuar plotësisht nga Komuna e Prishtinës.
“Përkundër kësaj mbështetjeje të konsiderueshme, menaxhmenti ka dështuar në mënyrë sistematike në përmbushjen e misionit të vet dhe ka prodhuar skandale të njëpasnjëshme për keqpërdorimin e parasë publike,” ka shkruar Rama.
Ai ka ngritur disa pyetje që, sipas tij, kërkojnë përgjigje të menjëhershme nga Kryeshefi i “Pastrimit”:
Cila është paga e Kryeshefit dhe e anëtarëve të tjerë të menaxhmentit?
Sa bonuse dhe shtesa janë ndarë për veten dhe rrethin e ngushtë në kohë humbjesh?
Pse janë kërkuar miliona euro për “konsulenca”?
Pse janë të punësuar 900 punëtorë për vetëm 30 kamionë?
Sa punëtorë të rinj janë punësuar nga janari deri në maj dhe me çfarë kriteresh?
Cili është borxhi i Komunës ndaj kësaj ndërmarrjeje dhe pse nuk është publikuar?
Rama e ka quajtur gjendjen aktuale “absurde” dhe ka theksuar se “koha për përgjegjësi ka ardhur”.
“Absurditeti, papërgjegjësia, dezinformimi dhe keqpërdorimi menaxherial i ndërrmarjes “Pastrimi” ka kaluar çdo kufi!”, ka shkruar ai.
