Këshilli për Mbrojtjen e të Drejtave dhe Lirive të Njeriut ka reaguar për situatën e rëndë në kryeqendrën e vendit për mbeturinat që nuk po grumbullohen, as nga ndërmarrja ‘Pastrimi’ e as nga Komuna e Prishtinës. KMDLNJ vlerëson se Prishtina është shndërruar në një deponi të madhe të plehrave.
Në një komunikatë për medie, KMDLNj bën të ditur se një situatë e tillë ka qenë edhe në të kaluarën dhe “duket se askush nga përgjegjësit nuk ka nxjerrë mësim nga ky dështim që seriozisht po e rrezikon shëndetin e qytetarëve, duke krijuar kushte për përhapje të ndonjë epidemie”.
“Mbeturinat e grumbulluara mbi dhjetë ditë përveç se kundërmojnë shumë, janë shpërndarë nga qentë endacakë duke e rritur numrin e tyre sikur edhe duke e rritur agresivitetin. Për qytetarët e Prishtinës nuk ka asnjë rëndësi kontesti midis komunës dhe kompanisë Pastrimi, por është me rëndësi të marrin shërbimet për çka edhe paguajnë”, thuhet në reagim.
Tutje, KMDLNj vë në dukje kontestin mes kompanisë ‘Pastrimi’ dhe të Komunës së Prishtinës, ndaj ky këshill fton të gjitha palët që kanë përgjegjësi në fushën e menaxhimit të mbeturinave ta bëjnë një zgjidhje të shpejtë, qoftë edhe të përkohshme për menaxhim të mbeturinave deri të bëhet një zgjidhje e qëndrueshme, duke ftuar gjithashtu dhe Prokurorinë e Shtetit të hetojë këtë rast duke identifikuar përgjegjësit e këtij kaosi të shëmtuar, por edhe qytetarë, që, në rast të moszgjidhjes së shpejtë dhe e qëndrueshme, t’i vendosin mbeturinat në oborrin e qeverisë së Kosovës, Komunës së Prishtinës dhe kompanisë ‘Pastrimi’.
“Nëse nuk bëhet një zgjidhje e shpejtë dhe e qëndrueshme, KMDLNj fton qytetarët që mbeturinat vendosin në oborrin e qeverisë së Kosovës, Komunës së Prishtinës dhe kompanisë”, thotë KMDLNj, që po ashtu fton qytetarët t’i paguajnë me rregull faturat për mbeturina në mënyrë që kjo çështje të krijojë qëndrueshmëri.
