Policia e Kosovës ka vazhduar kontrollet në trafik me veturat inteligjente të cilat janë të pajisura me teknologji të avancuar për njohjen automatike të targave.
Sipas policisë, qëllimi i këtyre kontrolleve është rritja e sigurisë në komunikacion dhe parandalimi i aksidenteve, përmes identifikimit dhe ndëshkimit të shkeljeve për mos respektim të kodit rrugor si dhe sjellje të papërgjegjshme në komunikacion.
“Vëmendje e veçantë do t’i kushtohet tejkalimit të shpejtësisë, përdorimit të telefonit gjatë vozitjes, mos vendosjes së rripit të sigurisë, tejkalimeve të rrezikshme, si dhe veturave të paregjistruara”, thuhet në njoftimin e policisë.
Uniformat blu u kanë rikujtuar pjesëmarrësve në trafik se shkeljet e kodit rrugor nuk tolerohen dhe do të trajtohen me seriozitet.
