E propozuara e Lëvizjes Vetëvendosje për kryetare të Kuvendit, deputetja Albulena Haxhiu ka deklaruar se Lëvizja Vetëvendosje e ka të qartë se çfarë do. Ajo ka thënë se LVV do që të konstituohet Kuvendi i Kosovës e më pas të procedohet me formimin e qeverisë së re.
“Ka kërkesë që të votohet komisioni për votimin e fshehtë. Në këtë drejtim nuk po propozohet ende kandidati për kryetar të Kuvendit, por po propozohet komisioni për votimin e fshehtë. Për Lëvizjen Vetëvendosje është e qartë se çfarë do. Pra, Lëvizja Vetëvendosje do që të vazhdojmë me hapa tjerë për votimin e qeverisë. Siç e dini kryeministri Kurti ka pesëmbëdhjetë ditë pastaj në dispozicion që të votohet qeveria e Kosovës”, ka theksuar ajo.
Haxhiu, pas dështimit të 19-të për konstituim të Kuvendit ka kritikuar partitë që ishin në opozitë, se nuk po dinë se çfarë duan.
“Nuk është e qartë çfarë do opozita. Pra, në vazhdimësi kanë qëndrime të ndryshme. Ata kanë preferenca, kanë emra të përveçëm, ne bazohemi në të drejtat kushtetuese”, ka theksuar ajo.
Haxhiu tutje theksoi se i takon Lëvizjes Vetëvendosje të bëjë propozimin për kryetar të Kuvendit.
“Nëse ne ndërtojmë një standard tjetër ku dikush tjetër na cakton neve emrat apo dikush tjetër ka kërkesa për të qenë në këtë pozicion, unë mendoj që ne nuk po e mishërojmë vullnetin e popullit. Vetëvendosje ka dalë subjekti i parë me 48 deputetë, prandaj ne po e deformojmë këtë. Por, edhe nëse vazhdojmë me preferenca siç po do opozita atëherë sot do ta kemi një kryetar që i pëlqen opozitës dhe nënkryetarë që i pëlqejnë pozitës. Por, ne nuk jemi këtu për t’i pëlqyer njëri-tjetrit. Ne jemi parti politike duhet të sillemi sipas rregullave kushtuese”, ka theksuar ajo.
