Presidentja e Kosovës, Vjosa Osmani, e ka vazhduar ditën e dytë të vizitës shtetërore në Zvicër me vizita në kantonet Thurgau dhe St. Gallen, ky i fundit edhe vendlindja e presidentes së Konfederatës Zvicerane, Karin Keller-Sutter.
Në një postim në Facebook, Osmani ka shprehur mirënjohjen dhe entuziazmin për mikpritjen dhe përvojën e veçantë të kësaj vizite.
“Ditën e dytë të vizitës shtetërore në Zvicër e filluam në kantonin e Thurgau dhe atë të St. Gallen, njëherit vendlindja e Presidentes Karin Keller-Sutter. Kënaqësi të përjetojmë nga afër historinë e pasur, kulturën e veçantë dhe inovacionin që e bën Zvicrën një shembull frymëzues për mbarë botën”, ka shkruar Presidentja Osmani.
Kjo vizitë kishte për qëllim forcimin e marrëdhënieve mes Kosovës dhe Zvicrës në fusha të ndryshme, përfshirë ekonominë, diasporën, arsimin dhe inovacionin.
