Është mbajtur në Prishtinë Forumi Ekonomik Kosovë-Nigeri, i organizuar nga Oda Ekonomike e Kosovës. Përmes këtij organizimi po tentohet të thellohet partneriteti i drejtpërdrejtë i komuniteteve të bizneseve ndërmjet të të dyja vendeve, me ç`rast u nënshkrua një memorandum bashkëpunimi në fushën e ekonomisë.
Ndonëse ende nuk e ka njohur Republikën e Kosovës, kjo nuk i pengon në thellimin e bashkëpunimit ekonomik. Pikërisht në këtë fushë Kosova dhe Nigeria po synojnë t`i hapin dyert e bizneseve të të dyja vendeve ani pse politika ende nuk e ka bërë. Madje për këtë Oda Ekonomike ka organizuar Forumin Ekonomik Kosovë-Nigeri, në të cilin është nënshkrua edhe një memorandum bashkëpunimi.
Kryetari i Odës Ekonomike të Kosovë, Lulzim Rafuna, këtë e quajti si një moment historik në thellimin e marrëdhënieve midis komuniteteve të biznesit.
“Nigeria, si një nga ekonomitë më të mëdha dhe më dinamike të Afrikës, ofron mundësi të jashtëzakonshme për tregti, investime dhe bashkëpunim. Nga ana tjetër, Kosova paraqet një fuqi punëtore të re, të talentuar, një lokacion strategjik në Evropën Juglindore dhe një frymë të gjallë sipërmarrëse. Këto pika të forta plotësuese janë një bazë e fortë mbi të cilën ne mund të ndërtojmë. Kosova mund të shërbejë si vend investimi në të ardhmen për biznesin nigerian, pasi ne jemi pjesë e tregut rajonal dhe mezi presim të bëhemi pjesë e tregut të përbashkët evropian. Prandaj, kjo mund të jetë një arsye shumë e rëndësishme që biznesi nigerian të vendosë prodhimin e tyre të biznesit në Kosovë”, tha Rafuna.
Drejtori i përgjithshëm i Dhomës së Tregtisë dhe Industrisë Bende në Nigeri, Ozemelam Nwosu, tha se përfitime nga këto organizime mund të çojnë në rritje të bashkëpunimit, rritje ekonomike dhe një prani më të fortë globale për dhomat e të dyja vendeve.
“Nigeria, duke qenë një vend me konsumatorë të lartë, e bën atë një treg për të gjitha produktet, deri më tani ato janë të cilësisë dhe standardit të lartë pa rreziqet e toksinave apo të rrezikshme për jetën e njeriut. Ne në Dhomën e Tregtisë besojmë se ky takim do t’i hapë dyer të shumta zhvillimi të madh ekonomik si dhomave ashtu edhe dy vendeve në përgjithësi. Marrëdhëniet midis Dhomës sonë të Tregtisë dhe Dhomës tuaj do të sjellin përfitime të jashtëzakonshme”, tha Nwosu
Në mes tjerash u tha se përmes partneriteteve të drejtpërdrejta Kosovë-Nigeri, shkëmbimi mund të çojë në vlerë reale dhe të qëndrueshme për ekonomitë e të dyja vendeve.
