Organizatat për Mbrojtjen e Fëmijëve protestojnë para Kuvendit të Kosovës, kërkojnë veprim nga deputetët.
Një grup organizatash të shoqërisë civile, të mbledhura nën ombrellën e Koalicionit për Mbrojtjen e Fëmijëve në Kosovë (KOMF), protestuan para Kuvendit të Kosovës, me thirrjen për më shumë përgjegjësi institucionale në mbrojtje të të drejtave të fëmijëve.
Të mbledhur në sheshin “Ibrahim Rugova”, përballë ndërtesës së Kuvendit në Prishtinë, protestuesit mbanin pankarta me moton: “Karriget tuaja nuk vlejnë më shumë se jeta dhe mirëqenia e fëmijëve”.
Protesta vjen në prag të një vazhdimi të seancës konstituive të Kuvendit, e cila, sipas organizatorëve, ka reflektuar një bllokadë politike që po ndikon drejtpërdrejt në jetën e fëmijëve në vend.
“Si pasojë e kësaj bllokade, shumë politika që ndikojnë në mirëqenien e fëmijëve kanë mbetur të pa miratuara,” tha Donjeta Kelmendi, drejtoreshë ekzekutive e KOMF-it. Ajo u bëri thirrje deputetëve të reflektojnë mbi rolin e tyre kushtetues dhe përgjegjësinë ligjore për të vepruar në mënyrë të menjëhershme.
“KOMF kërkon që Kuvendi të marrë masa të qarta për garantimin e mbrojtjes së të drejtave të fëmijëve. Çdo vendim i vonuar është një barrë që fëmijët e paguajnë me shëndetin, mirëqenien dhe, në raste të caktuara, me jetën e tyre,” theksoi ajo.
Protesta u zhvillua në mënyrë paqësore dhe zgjati rreth një orë.
