Përfaqësuesja e Kosovës U21 në futboll ka zhvilluar katër ndeshje miqësore me Maqedoninë e Veriut. I ka tri fitore e një barazim. Ndërsa dy ndeshje tjera miqësore me këtë përfaqësuese, Kosova U21 do t’i zhvillojë në këtë muaj.
Të parën e zhvillon të mërkurën nga ora 19:00 në stadiumin “Fadil Vokrri” në Prishtinë, ndërsa të shtunën e ardhshme nga ora 15:00, e luan miqësoren tjetër në Shkup.
Trajneri Afrim Tovërlani ka publikuar listën për ndeshjet miqësore, që janë përgatitje për kualifikimet e ‘Euro 2027’ që do të organizohet në Shqipëri e Serbi.
Kosova është në Grupin A me Spanjën, Rumaninë, Finlandën, Qipron dhe San Marinon.
Tovërlani ka ftuar 23 futbollistë.
Kualifikimet për në “Euro 2027”, Kosova i nis me ndeshjen në udhëtim te Rumania më 5 shtator, ndërsa i mbyll në Prishtinë më 6 tetor ndaj Finlandës.
