Një investitor 37-vjeçar i kriptomonedhave është nxjerrë në gjykatë pasi u arrestua me dyshimin për rrëmbimin dhe torturimin e një turisti italian në një shtëpi në Manhattan, raportuan mediat amerikane.
John Woeltz u paraqit në Gjykatën Penale të Nju Jorkut në orën 9 të mëngjesit sipas kohës lokale me akuzat për rrëmbim me qëllim zhvatjeje, sulm, burgosje të paligjshme dhe krime të tjera, tregojnë dokumentet e gjykatës. 24-vjeçarja Beatrice Folchi u arrestua gjithashtu në lidhje me rastin, raportoi CBS News.
Të dy u arrestuan pasi viktima arriti të arratisej nga një shtëpi në lagjen SoHo të Nju Jorkut, ku, sipas policisë, ai ishte lidhur dhe torturuar për javë të tëra.
Viktima, një shtetas italian 28-vjeçar, emri i të cilit nuk është bërë i ditur, u dërgua në spital dhe është në gjendje të qëndrueshme, tha policia. Sipas mediave, në shtëpinë luksoze ku viktima ishte e lidhur dhe e torturuar u gjetën fotografi, si dhe armë zjarri. Viktima i tha policisë se kishte mbërritur në Nju Jork nga Italia më 6 maj dhe se, me të mbërritur në shtëpinë e të dyshuarit, Woeltz i kishte marrë pasaportën dhe e kishte mbajtur peng derisa ajo arriti të arratisej të premten në mëngjes.
Sipas një kallëzimi penal të parë nga ABC News, viktima tha se Woeltz dhe një person tjetër e rrahën dhe e varën në buzë të një ndërtese kur ai refuzoi të zbulonte fjalëkalimin e portofolit të tij bitcoin. Woeltz, një investitor në kriptomonedha nga shteti i Kentucky-t, merrte me qira një shtëpi në SoHo për një çmim midis 30,000 dhe 40,000 dollarëve në muaj, sipas CBS News.
