Shkruan: Ismail MUÇIQI
Është bërë evidente se kjo gjeneratë e politikanëve, gazetarëve, analistëve dhe pseudointelektualëve në Kosovë ka probleme me vetveten. Këtë e dëshmon indiferenca e tyre ndaj aktivitetit politik dhe diplomatik të Presidentes së Republikës së Kosovës, Vjosa Osmani. Presidentja Osmani renditet ndër presidentët më me autoritet jo vetëm në Ballkan, por edhe në Evropë e më gjerë. Kjo nuk është vetëm një vlerësim personal, por edhe një qëndrim i përbashkët i politikanëve dhe diplomatëve më me ndikim në arenën ndërkombëtare. Është e pajustifikueshme dhe e dhimbshme që njerëzit e politikës në Kosovë e shohin me xhelozi, e jo me krenari, suksesin dhe angazhimin ndërkombëtar të zonjës Osmani. Fatkeqësisht, një pjesë e madhe e mjeteve të informimit në Kosovë i paraqesin vizitat e Presidentes në Afrikë, Zvicër apo në Shtetet e Bashkuara të Amerikës si lajme të dorës së dytë apo të tretë, duke informuar shumë pak ose aspak publikun për rëndësinë e këtyre vizitave. Vetë fakti që zonja Osmani, gjatë vizitës së saj në Zvicër këto ditë, u prit me nderime të larta shtetërore nga Qeveria dhe Presidentja e Zvicrës, flet për respektin dhe autoritetin që ajo gëzon. Çdo shqiptar normal duhet të ndihet krenar për përfaqësimin dinjitoz të Republikës së Kosovës në skenën ndërkombëtare. Qysh më parë kemi shkruar se disa media, veçanërisht disa televizione, janë themeluar me qëllime biznesore dhe jo për të informuar publikun në mënyrë profesionale dhe etike. Në shumë prej tyre mbizotëron një politikë redaktuese që synon denigrimin apo margjinalizimin e punës së Presidentes dhe kuadrove të tjera të përgatitura në aspektin politik, profesional dhe kombëtar, në të mirë të shtetit të Kosovës. Me inate të tilla, të mbështjella me xhelozi të sëmurë, nuk mund të ecet përpara. Situata aktuale politike në Kosovë, ku grupet e interesit dhe klanet mafioze – të lidhura me të ashtuquajtura parti politike – kanë filluar pazare dhe kalkulime për ta penguar rizgjedhjen e Presidentes Osmani, edhe pse mandati i saj nuk ka përfunduar ende, është dëshmi e një shoqërie të kalbur. Si mund të arsyetohen mediat dhe politika jonë, kur vizitës së Presidentes Osmani në Zvicër i dhanë hapësirë agjencitë më të njohura ndërkombëtare, si Radio Evropa e Lirë, Euronews dhe BBC, ndërsa mediat tona nuk e patën as vullnetin për të realizuar një dokumentar apo një emision të zgjeruar për këtë vizitë dhe takimet që ajo zhvilloi me diasporën shqiptare atje? Kjo është një turp i madh – një dështim i radhës i politikës redaktuese të mjeteve të informimit në Kosovë, të cilat në shumicën e rasteve janë shndërruar në pronë private të biznesmenëve apo njerëzve të lidhur me mafien, të njohur për publikun. Derisa shtetet përreth nesh krenohen me figurën dhe personalitetin e Presidentes Vjosa Osmani, partitë politike në Kosovë, të cilat kanë bllokuar punën e shtetit me mbi 22 mbledhje të dështuara të Kuvendit, e shikojnë me xhelozi aktivitetin e saj diplomatik. Dhe kjo, në një kohë kur ajo ka depërtuar me sukses deri në Departamentin e Shtetit Amerikan, Kongres, Senat e deri te Shtëpia e Bardhë. Në fund, duhet theksuar se Presidentja Vjosa Osmani po mban gjallë raportet dhe marrëdhëniet diplomatike me shtete të ndryshme të botës, duke e ruajtur dhe përforcuar imazhin e Republikës së Kosovës.
