Dy persona janë dërguar në mbajtje nën dyshimin për përfshirje në veprat penale “Mashtrim” dhe “Falsifikim i Dokumenteve”, pas hetimeve disa mujore të zhvilluara nga Drejtoria për Hetimin e Krimeve Ekonomike dhe Korrupsionit (DHKEK), në bashkëpunim me Prokurorinë Themelore në Gjilan.
Sipas njoftimit të policisë, dy të dyshuarit, G. J. (lindur më 1986) dhe A. A. (lindur më 2000), dyshohet se kanë mashtruar qytetarë të ndryshëm në rajonin e Gjilanit, duke i bërë ata të nënshkruajnë kontrata dhe të paguajnë avans për produkte që kurrë nuk u janë dorëzuar.
“Gjatë hetimeve, NJRHKEK-Gjilan, ka identifikuar 13 persona të dëmtuar në komunat e Gjilanit dhe Vitisë. Këta qytetarë janë futur në obligime kontraktuale në vlerë totale prej 24,607.00 €, ndërsa 9 prej tyre kanë paguar edhe avans në shumën prej 3,494.00 €, me premtimin se produkti dhe dhuratat do t’iu dorëzoheshin pas nënshkrimit të kontratave, gjë që nuk ka ndodhur. Me këto veprime është krijuar dyshim i bazuar se të dyshuarit kanë kryer veprën penale: ‘Rastet e posaçme të falsifikimit të dokumenteve’ dhe ‘Mashtrim’”, thuhet në njoftimin e policisë.
Të dyshuarit janë intervistuar në cilësinë e të dyshuarve në prezencën e avokatit sipas detyrës zyrtare dhe me aktvendim të prokurorit janë ndaluar për 48 orë.
