Deputetja e LDK-së, Hykmete Bajrami, ka thënë se nuk ka korrupsion më të madh se sa korrupsioni që po ndodhë me energji, e këtë sipas saj, duhet ta dijë Prokuroria.
Ajo ka thënë se duhet të hetohet çdo gjë, në të gjitha institucionet.
“Duhet të hetohet KEK-u: Pse remontet bëhen dimrit? A është gjeneruar energji më shumë verës e natën kur nuk kemi konsum edhe aq, më pak ditën duke ndikuar në rritjen e importit? Të hetohen tenderët dhe ndikimi i realizimit të tyre në kapacitetet gjeneruese dhe rritjen e importit?”, shkroi ndër të tjera ajo.
Tutje, sipas Bajramit, duhet të hetohet edhe Qeveria, Ministria e Ekonomisë dhe sipas saj të hetohen ndërhyrjet në KEK, ZRRE, e KOSST.
“Duhet të hetohet Qeveria, /Ministria e Ekonomisë dhe ndërhyrjet politike në KEK, ZRRE dhe KOSTT. Duhet të hetohet KOSTT-i: Si është e mundur që çmimet në ALPEX janë më të shtrenjta sesa në HUPX gjatë tërë vitit 2024 dhe gjatë viti 2025? Si është lejuar të kalojë importi i energjisë me çmim transporti deri në 800 euro për MWh? Duhet të hetohet ZRRE-ja, sepse kjo licencon KEK-un, KOSTT-in dhe të gjithë operatorët privatë. Duhet të hetohet NOA si tregtari më i madh i energjisë dhe lidhjet e kësaj kompanie me Serbi e me këdo në Kosovë si dhe kompanitë dhe palët e tjera përfituese në krejt këtë situatë”, ka thënë ajo.
Sipas deputetes së LDK-së, kushdo që e zbardh këtë skemë, siç thotë ajo, do të hyjë në historinë e këtij shteti si patrioti më i madh i pasluftës.
“Përndryshe, nëse ky skandal i përmasave të Watergate heshtet dijeni të gjithë se do të shkatërrojë ekonominë e këtij vendi dhe do ta varfërojë çdo familje në Kosovë. Mos harroni, në Kosovë janë mbi 700 mijë njehsorë/matës të energjisë – një euro më shumë në muaj për secilin, llogaritni sa kushton, por rritja prej 128% sa mendoni se është? E rritja deri në 260% për 1300 biznese – sa? Krejt këto kanë çmimin e të ardhmes së këtij vendi – nuk guxojmë me u bë peng i këtyre përfituesve, andaj na duhet reagim!”, tha ajo.
Bajrami shtoi se një shtet dhe një shoqëri nuk mund të dorëzohen para veprës më të madhe korruptive që po ndodh në historinë e vendit.
“Falënderoj gazetarët që kanë shpërfaqë fakte shokuese dhe na i kanë hapë sytë me gisht siç thotë populli, për me pa se çka po ndodhë në sektor”, përfundoi postimin e saj deputetja e LDK-së.
