Ministri i ri i Jashtëm gjerman, Johann Wadephul, ka kritikuar ashpër veprimet e Izraelit në Rripin e Gazës, por nuk ka mbështetur një embargo armësh të kërkuar nga Spanja për shkak të situatës dramatike humanitare në terren.
“Askush nuk po thotë se situata aktuale është e pranueshme dhe mund të tolerohet më. Madje as Gjermania”, tha demokrati i krishterë në një takim me homologun e tij spanjoll José Manuel Albares në Madrid.
Spanja mbështet një embargo ndërkombëtare armësh në Lindjen e Mesme. Albares theksoi se iniciativa e vendit të tij synon “bashkimin e gjithnjë e më shumë vendeve në mënyrë që paqja të mbretërojë në Lindjen e Mesme”. Armët shtesë “janë gjëja e fundit që i duhet rajonit në këtë moment”, theksoi ai, duke shtuar se Rripi i Gazës “nuk duhet të shndërrohet në një varrezë të madhe”.
“Asgjë që propozon Spanja nuk drejtohet kundër shtetit të Izraelit”, sqaroi Albares.
Apel urgjent
Wadephul i bëri thirrje urgjente qeverisë izraelite dhe Hamasit islamist që t’i japin fund konfliktit nëpërmjet negociatave. Ashtu si Albares, ai përsëri bëri thirrje për një zgjidhje me dy shtete, në të cilën Izraeli dhe palestinezët bashkëjetojnë në paqe. Kryeministri izraelit Benjamin Netanyahu dhe Hamasi e kundërshtojnë një qasje të tillë.
“Nuk duhet të ketë dëbim nga Rripi i Gazës. Gjithashtu nuk duhet të ketë politikë urie. Në vend të kësaj, popullit të Gazës duhet t’i sigurohet ndihmë dhe mallra humanitare të mjaftueshme. Situata atje është përmirësuar disi, megjithëse ende jo mjaftueshëm. Ne mbetemi të qartë në kritikat tona dhe po aq të qartë në thirrjet tona drejtuar Izraelit”, deklaroi Wadephul.
Në kontekstin e kërcënimeve të jashtme ndaj Shtetit të Izraelit, Wadephul theksoi se siguria e tij mbetet një interes themelor i shtetit gjerman. “Kjo, sigurisht, përfshin edhe gatishmërinë për dërgesa të ardhshme të armëve. Duke pasur parasysh situatën humanitare në Gaza, kjo përfaqëson një dilemë të madhe politike dhe morale për ne”.
