Derisa të dielën u shënua edhe dështimi i 21-të për konstituimin e Kuvendit nga legjislatura e 9 e dalë nga zgjedhjet e 9 shkurtit, ish-presidenti i Kosovës, Fatmir Sejdiu thotë se bllokimi i zgjedhjes së kreut të Kuvendit paraqet një situatë të pazakonshme institucionale dhe politike.
Sipas tij, kjo gjendje po reflekton mungesë të konsensusit politik dhe gatishmërisë për kompromis, duke dëmtuar drejtpërdrejt stabilitetin institucional dhe besimin e qytetarëve në procesin demokratik.
“Është nevojë urgjente që pozita dhe opozita të tregojnë maturi politike dhe fleksibilitet, duke u angazhuar në dialog serioz për të arritur një marrëveshje. Bashkëpunimi ndërpartiak është çelës për zhbllokimin e situatës dhe rikthimin e funksionimit normal të institucioneve”, ka shkruar ai.
Sipas ish-presidentit, nëse kriza vazhdon, rrezikohet jo vetëm puna e Kuvendit dhe formimi i Qeverisë, por edhe stabiliteti politik në vend.
“Pasojat mund të përfshijnë: zgjedhje të reja të parakohshme, krizë të besueshmërisë në institucione dhe dëmtim të imazhit ndërkombëtar të Kosovës”.
Sejdiu thotë se shoqëria ka nevojë për institucione funksionale dhe për angazhim të përbashkët politik që u përgjigjen pritjeve të qytetarëve për zhvillim, stabilitet dhe përparim demokratik.
“Vetëm përmes paqes publike, bashkëpunimit dhe mirëkuptimit mund të ndërtojmë një të ardhme të sigurt dhe të qëndrueshme për vendin tonë”, përfundoi Sejdiu.
