Derisa natën e mbrëmshme është përmbyllur afati për të përfituar grante për bizneset mikro, të vogla e të mesme, në Ministrinë e Tregtisë e Industrisë kanë shkuar afër 1 mijë aplikime që synojnë të përfitojnë nga skema 5 milionëshe nga industria prodhuese.
Këtë numër e shpalosi në magazinën “Info Plus” të RTK-së, Zef Dedaj që është ushtrues detyre i drejtorit të përgjithshëm të KIESA-s
Ai e quajti këtë si njërën nga grant-skemat më të lartën për nga vlera, por edhe nga rëndësia.
“Sepse targeton sektorët në kuadër të politikës industriale. Janë rrjedhimisht 9 sektorë që përmes kësaj grant-skeme do të mbështeten për blerje të makinerive të avancuara prodhuese, e cila ka për qëllim që kompanitë, firmat kosovare prodhuese e përpunuese nga këta sektor të mbështeten me mjete financiare për blerje të makinerisë që do t’i ndihmojë bizneset që të rrisin kapacitete e tyre prodhuese apo përpunuese”, tha ai.
Tutje, Dedaj tregoi se thirrja është e ndarë në tri lote, për kompanitë mikro, të vogla e të mesme.
“Ato me të punësuar deri në 9 punëtorë do të kenë mundësinë të përfitojnë deri në 40 mijë euro, ato të mesme nga 10 deri në 49 punëtorë do të kenë mundësinë që të përfitojnë deri në 80 mijë e euro, dirsa kompanitë nga 50 punëtorë deri në 249 punëtorë, do të kenë mundësinë të përfitojnë deri në 120 mijë euro”, tregoi Dedaj.
Ai ka treguar edhe për kriteret që kanë qenë e për të cilat tha se ka pasur zero tolerancë.
“Faza e parë është standarde, kërkohet dëshmia për certifikatën e regjistrimit të biznesit, numri unik i biznesit, certifikata nga gjykata që nuk je në falimentim ose nën hetime, certifikata nga ATK-ja me numrin e punëtorëve, kjo i mundëson komisionit vlerësues të bëjë kategorizimin e kompanive nëse është mikro, e vogël ose e mesme. Certifikatën nga ATK-ja për qarkullim, xhirollogaria bankare, e këtu ka zero tolerancë”, tha ai.
Dedaj ka treguar se brenda dy ditësh më së largu do të themelohet edhe komisioni verues për t’i vlerësuar aplikimet.
