Ministrja në detyrë e Punëve të Jashtme, Donika Gërvalla ka reaguar lidhur me intervistimin e Faton Pecit nga Prokuroria Speciale në cilësinë e të dyshuarit.
Ajo e quajtur këtë si inskenim të gërditshëm duke e drejtuar gishtin drejt Blerim Isufajt që është kryeprokuror i Prokurorisë Speciale.
“Inskenim i gërditshëm ky aksioni i sotëm i Blerim Isufajt kundër ministrit Faton Peci, ministrit më shembullor të këtij mandati. Hakmarrje e shëmtuar ndaj betejës së suksesshme të Fatonit kundër korrupsionit dhe guximit të tij për t’u ballafaquar me secilën shkelje të ligjit, pa marrë parasysh se sa të rrezikshëm janë shkelësit dhe sa shumë shokë e ortakë kanë në Prokurorinë Speciale”, shkroi ajo.
Gërvalla thotë se kur pikërisht ata që e kanë për detyrë ta mbrojnë shtetin ligjor dhe qytetarët e Republikës nga krimi i keqpërdorin organet e drejtësisë për hakmarrje dhe për të njollosur figurat e suksesshme dhe të pastra politike, atëherë asgjë më nuk duhet të t’i habisë.
“Por, kthim prapa nuk ka. Deri në reformimin e plotë edhe të sistemit të drejtësisë”, ka shkruar, Gërvalla.
