Kryetari i Aleancës për Ardhmërinë e Kosovës, Ramush Haradinaj, ka shprehur mirënjohje për strukturat e degës së AAK-së në Pejë me rastin e 25-vjetorit të themelimit të saj, duke theksuar përkushtimin për rikthimin e qeverisjes së Aleancës në këtë komunë.
“Në Pejë, me rastin e 25-vjetorit të themelimit të Degës së AAK-së, shpreha mirënjohjen e thellë për udhëheqësit aktualë të degës, aktivistët dhe secilin koleg që ishte pjesë e rrugëtimit të përbashkët politik ndër vite. Bashkë kaluam sfida jo të lehta, por me përkushtim i kthyem ato në suksese për Pejën dhe Kosovën,” ka shkruar Haradinaj në Facebook.
Ai ka vlerësuar lartë anëtarët e degës së Pejës: “Aleanca në Pejë ka në radhët e saj burra e gra të dëshmuar, njerëz me vlera të larta, që kanë dhënë kontribut në liri, në ndërtim të shtetit dhe në zhvillim të qytetit.”
Haradinaj ka paralajmëruar angazhim maksimal në zgjedhjet lokale të tetorit.
“Sot, me të njëjtën energji e gatishmëri, jemi të vendosur që në zgjedhjet lokale të tetorit t’i kthejmë Pejës qeverisjen shembullore që e meriton”, ka theksuar ai.
