Derisa kërcënime të tjera i kanë shkuar në adresë të presidentes së shtetit, Vjosa Osmani, njohësi i fushës së sigurisë, profesori, Avni Islami në magazinën “Info Plus” të RTK-së, dy kërcënimet e fundit ndaj të parës së shtetit i ka quajtur, kërcënime serioze.
“Unë besoj që nuk duhet të neglizhohet sepse ky kërcënimi i fundit është një kërcënim për vrasje e kjo përbën vepër penale, kur dihet se kemi të bëjmë me figurë të lartë shtetërore, siç janë presidentja, kryeministri, kryetari i Kuvendit apo kryetari i Gjykatës Kushtetuese, janë figure qendrore të shtetit. Vepra Penale të tilla janë të dënueshme deri ne 10 vjet burg, dhe ata që po i bëjnë këto kërcënime duhet ta dinë se do të zbulohen, arrestohen e dalin para drejtësisë”, tha Islami.
Profesori Islami, shtoi se secili kërcënim që vije nga kushdo qoftë duhet të merret seriozisht, ndonëse thotë se nuk shoh rrezik për presidenten e Kosovës.
“Sepse janë organet e sigurisë të cilët të gjithë të unifikuar e bëjnë sigurimin e presidentes e të gjithë zyrtarëve të tjerë të lartë shtetëror. Unë nuk them që jeta e presidentes është në rrezik, sepse unë nuk konsideroj që është në rrezik, sepse kërcënime të tilla nuk e zmbrapsin qoftë presidenten apo figura të tjera, sepse janë organet e sigurisë që merren me sigurinë e tyre, mirëpo asnjë kërcënim ose kanosje nuk duhet të neglizhohet”, tha ai në “Info Plus” të RTK-së.
Islami, tutje tha se mos konstituimi i institucioneve të reja, në aspektin e sigurisë nuk ka zbrazëtirë juridike, nuk ka mungesë kompetencash, sepse, sipas tij, të gjitha institucionet e sigurisë janë me kompetenca të plota dhe ky fakt nuk përbën kërcënim të sigurisë, ndonëse tha se mund të ketë të ketë ngecje në aspektin ekonomik e diplomatik.
