Prokuroria Themelore në Prizren, përmes Departamentit për Krime të Rënda, ka njoftuar se ka ngritur aktakuzë ndaj një personi me inicialet S.K., i cili ndodhet në paraburgim që nga data 18 prill 2025, nën dyshimin për kryerjen e dy veprave të rënda penale.
Sipas aktakuzës së ngritur, S.K. akuzohet për veprën penale “Vrasja në tentativë”, sipas nenit 172 të Kodit Penal të Republikës së Kosovës (KPRK), në lidhje me nenin 28, si dhe për veprën penale “Mbajtja në pronësi, kontroll ose posedim të paautorizuar të armëve”, sipas nenit 366 paragrafi 1 të të njëjtit kod.
“Sipas aktakuzës, me datë 18.04.20245, rreth orës 21:00, në Prizren, në rrugën “Xhevat Berisha”, i pandehuri S.K., pas një mosmarrëveshjeje paraprake, me dashje tenton të privojë nga jeta të dëmtuarin N.B., në atë mënyrë që pas një aksidenti që ka ndodhur me automjete dhe pas një fjalosje të shkurtër lidhur me aksidentin, i pandehuri e nxjerrë një brisk me hapje e llojit ‘Boker’, me gjatësi tehu 9.5 cm, dhe e godet dy herë të dëmtuarin, duke i shkaktuar dëmtime të rënda trupore, plagë prerëse dhe shpuese, të shkaktuara nga veprimi mekanik i mjetit të fortë dhe të mprehtë. Me këto veprime, i pandehuri ka kryer veprën penale ‘Vrasja në tentativë’ sipas KPRK-së”, thuhet në njoftim.
Përveç tentim vrasjes, S.K. akuzohet edhe për mbajtje të paautorizuar të armës së ftohtë, përkatësisht briskut të përdorur gjatë incidentit, të cilin nuk e ka poseduar me leje valide, duke vepruar në kundërshtim me ligjet në fuqi që rregullojnë posedimin dhe mbajtjen e armëve.
Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartcekur për veprat penale për të cilat akuzohet të shpallet fajtor dhe të dënohet sipas ligjit.
