Bashkimi Demokratik për Integrim shpreh shqetësim për punësimet e fundit në hidrocentralin Mavrovë – Vërtok, ku janë angazhuar 12 persona të rinj dhe asnjë prej tyre nuk është shqiptar, ndonëse sipas kësaj partie, ky hidrocentral ndodhet në zonën e Gostivarit, ku shqiptarët përbëjnë shumicën e popullsisë.
Përmes një komunikate për medie, BDI bën të ditur se ky vendim paraqet një shembull të qartë të përjashtimit etnik në institucionet publike dhe shkon në kundërshtim me frymën e përfaqësimit të drejtë, për të cilën është ndërtuar modeli institucional i shtetit.
Sipas kësaj partie, një qasje e tillë, përveçse dëmton ndjeshëm besimin qytetar, e rrezikon kohezionin ndëretnik dhe komprometon parimet themelore të funksionimit demokratik dhe shumetnik të shtetit.
BDI thekson se ky nuk është një rast i izoluar, por pjesë e një tendence sistematike për spostimin e qytetarëve shqiptarë nga pjesëmarrja në institucionet shtetërore, për çka kemi ngritur shqetësime të përsëritura në muajt e fundit.
“I bëjmë thirrje Avokatit të Popullit, si dhe përfaqësuesve të bashkësisë ndërkombëtare në vend të ndërmarrin menjëherë procedurat e nevojshme për vlerësimin e kësaj gjendje provokuese si dhe të konstatojë nëse ka pasur shkelje të të drejtave për përfaqësim të barabartë dhe mosdiskriminim, si dhe me vëmendje të ndjekin këto zhvillime shqetësuese, të cilat bien ndesh me angazhimet për ndërtimin e një shteti gjithëpërfshirës, të drejtë dhe funksional”, thuhet në komunikatë
Tutje, BDI thekson se do të vazhdojë të angazhohet në mënyrë të palëkundur për mbrojtjen e të drejtave të qytetarëve shqiptarë, për respektimin e barazisë dhe ruajtjen e karakterit shumetnik të institucioneve në Republikën e Maqedonisë së Veriut.
