Shkruan: Ali Sh. MEHMETI
Ndërtimi i Fabrikës për trajtimin e mbetjeve shtazore në Kosovë ka përfunduar në vitin 2019, edhe pse ka filluar në vitin 2013.
Çmimi i parashikuar për ndërtimin e saj ishte 7,7 milion euro prej të cilave 5,7 milion euro ishte donacion nga BE. Përkundër kësaj, deri në vitin 2022 vlera e saj ka arritur në mbi 10 milion euro sepse kanë munguar disa pajisje bazike.
Fabrika në fjalë asnjëherë nuk është funksionalizuar.
Në janar të vitit 2025 është nënshkruar kontrata për funksionalizimin e saj duke e dhënë me qira një firme me emrin “LIP KS & IT” Sh.P.K. Sipas kontratës, kompania obligohet të paguaj një qira prej 30 mijë euro brenda vitit.
Pa dashur të fus dorën në zjarr për askënd, por duke i njohur rrethanat në sistemin e (pa)drejtësisë dhe shpejtësinë e reagimit nga ana e prokurorisë kur është në pyetje qeveria aktuale, mund të shtrohen disa pyetje:
– Pse ka zgjatë 6 vjet ndërtimi i kësaj fabrike dhe nuk është kompletuar as atëherë?
– Pse ndërtimi ka kushtuar 50% më shumë sesa ishte paraparë?
– A është bërë ndonjëherë auditimi financiar, nëse po, cili ishte raporti?
– Çka ka ndodh gjatë gjithë këtyre viteve me mbetje shtazore, përveç se janë futur nëpër kontejnerë për bërllok nëpër qytetet e Kosovës apo diku diku edhe janë groposur?
– Sa njerëz janë infektuar nga këto mbetje që i kanë shpërndarë zogjtë apo qentë?
– Kur funksionalizohet kjo fabrikë, a do janë të obliguar përpunuesit e mishti të paguajnë shërbimin për përpunimin e këtyre mbetjeve?
– A mos është korruptuar prokuroria nga përpunuesit e mishit që do detyrohen të paguajnë për shërbimin në fjalë?
